Qysta avtokólik nómirin qar japqan júrgizýshiler 20 myń teńge kóleminde aıyppul arqalaıdy, dep habarlaıdy "Adyrna" ulttyq portaly Massagetke siltep.
Ákimshilik quqyq buzýshylyq týraly kodekstiń 590-babynyń 1-bóligine sáıkes, kólik quraldaryn paıdalaný erejelerin buzý, atap aıtqanda, oqylmaıtyn nemese sáıkes kelmeıtin memlekettik tirkeý nómirlerimen kólik júrgizý – aıyppul salýǵa negiz bolady.
2025 jyly aılyq eseptik kórsetkish (AEK) mólsheri 3 932 teńge bolyp bekitilgen. Osyǵan baılanysty, bes AEK mólsherinde aıyppul somasy 19 660 teńgeni quraıdy.
Sarapshylardyń aıtýynsha, kólik nómirlerin qardan, muzdan nemese lastan ýaqytyly tazalaý júrgizýshiniń joldaǵy qaýipsizdigi men basqa qatysýshylar úshin mańyzdy. Sonymen qatar, kóliktiń nómiri oqylmasa, bul baqylaý kameralary arqyly jol erejesin qadaǵalaýdy qıyndatýy múmkin.
Aıta keteıik, kólik ıeleri zań buzýshylyqqa jol bermeý úshin kúndelikti kólikteriniń tehnıkalyq jaǵdaıyn, sonyń ishinde memlekettik nómirdiń kórinýin tekserip otyrýy qajet.
