23 قاڭتاردا اقش پرەزيدەنتى دونالد ترامپ بىرقاتار جارلىقتارعا قول قويدى. ونىڭ ىشىندە ابورتقا قارسى نارازىلىقتارعا قاتىسۋشىلاردى كەشىرۋ تۋرالى شەشىم قابىلدادى جانە اتىشۋلى وقيعالار قۇپياسىن اشۋعا بۇيىردى، دەپ حابارلايدى “ادىرنا” ۇلتتىق پورتالى.
“گولوس امەريكي” سايتىنىڭ مالىمەتىنشە، ترامپ پرەزيدەنتتىك مىندەتىن اتقارىپ تۇرعان كەزدە، ول 1963 جىلى دجون كەننەديدىڭ، 1968 جىلى روبەرت كەننەديدىڭ جانە ازاماتتىق قۇقىقتار قوزعالىسىنىڭ جەتەكشىسى مارتين ليۋتەر كينگتىڭ ولىمىنە قاتىستى ۇكىمەت قۇجاتتارىن جاريالاۋعا پارمەن بەردى.
«بارلىعى اشىلادى»، — دەپ مالىمدەدى ترامپ اق ۇيدە جارلىققا.
سايلاۋدا جەڭگەننەن كەيىن، 2022 جىلدىڭ قاراشا ايىندا دونالد ترامپ ءوزىنىڭ سايلاۋالدى ۋادەسىن قايتالاپ، دجون كەننەديدىڭ ولىمىمەن بايلانىستى سوڭعى قۇجاتتاردى جاريالاۋعا ۋادە بەرگەن بولاتىن. بۇل قۇجاتتار «اسا قۇپيا» دەپ بەلگىلەنىپ، ۇلتتىق ارحيۆتە ساقتالعان.
1964 جىلى دجون كەننەديدىڭ ءولىمىن تەرگەۋگە قاتىستى رەسمي كوميسسيا لي حارۆي وسۆالدتىڭ جالعىز ارەكەت ەتكەنىن جاريالاعان ەدى. بىراق كەننەديدىڭ ءولىمى ءالى دە ءتۇرلى بولجامدارعا نەگىز بولىپ كەلەدى.
2022 جىلدىڭ جەلتوقسان ايىندا ۇلتتىق ارحيۆ دجون كەننەديدىڭ ولىمىنە بايلانىستى 13 مىڭنان استام قۇجاتتى جاريالادى. الايدا دجو بايدەن اكىمشىلىگى كەيبىر قۇجاتتاردى ۇلتتىق قاۋىپسىزدىك سەبەپتەرىمەن جاريالاۋدى توقتاتتى.
دجون كەننەديدىڭ اعاسى روبەرت فرەنسيس 1968 جىلى لوس-اندجەلەستە ءولتىرىلدى. سول كەزدە ول پرەزيدەنتتىككە ۇمىتكەر رەتىندە باستى كانديدات بولعان ەدى. ال مارتين ليۋتەر كينگ 1968 جىلدىڭ 4 ساۋىرىندە مەمفيس قالاسىندا سەگرەگاتسيانى قولدايتىن ادام تاراپىنان ءولتىرىلدى. ول سول جەرگە قوقىس جيۋشىلاردىڭ ەرەۋىلىنە قولداۋ كورسەتۋ ءۇشىن كەلگەن ەدى.
سول كۇنى ترامپ تاعى دا بىرنەشە جارلىققا قول قويدى. ونىڭ ىشىندە 23 ابورتقا قارسى نارازىلىقتارعا قاتىسۋشىنى كەشىرۋ تۋرالى جارلىق بار. ترامپتىڭ ايتۋىنشا، بۇل ادامدارعا قاتىستى سوتقا تارتۋ ادىلەتسىز بولعان جانە ولاردىڭ كوپشىلىگى قارت ادامدار.
سونىمەن قاتار، ترامپ سيەتلدەگى سۋديانىڭ تۋعان جەرى بويىنشا ازاماتتىق الۋ قۇقىعىن شەكتەۋ تۋرالى جارلىعىن ۋاقىتشا توقتاتۋ تۋرالى شەشىمىنە قارسى شاعىمداناتىندىعىن مالىمدەدى.
ترامپتىڭ سول كۇنى قول قويعان تاعى ءبىر جارلىعى – سولتۇستىك كاروليناداعى لۋمبي تايپاسىنا فەدەرالدىق تانۋدى قامتاماسىز ەتۋ تۋرالى جوسپاردى دايىنداۋ.
ايتا كەتەيىك، بۇگىن ترامپ سولتۇستىك كاروليناداعى «حەلەن» داۋىلىنىڭ اپاتىنان زارداپ شەككەن وڭىرلەردى كورۋ ءۇشىن ساپارعا شىعادى.