الەۋمەتتىك جەلىلەردە مىسىردا قازاقستاندىق ازاماتتاردى جاپپاي ۇستاۋ باستالدى دەگەن اقپارات تاراۋدا، دەپ حابارلايدى "ادىرنا" ۇلتتىق پورتالى.
وندا جەرگىلىكتى پوليتسيانىڭ كوشەلەر مەن ۇيلەردەن ادامداردى كۇشتەپ الىپ كەتىپ، ستۋدەنتتەردى دە ۇستاپ جاتقانى،كەيبىر ازاماتتاردىڭ زاڭدى قۇجاتتارى بولعانىنا قاراماستان ەلدەن دەپورتاتسيالانعانى تۋرالى جازىلعان.
جەلىدە تاراعان اقپاراتقا سۇيەنسەك، ۇستاۋ كەزىندە قۇقىق قورعاۋ ورگاندارى ازاماتتاردىڭ جەكە زاتتارىن تاركىلەپ، كەيىن قايتارماعان دەگەن دە مالىمەتتەر بار. سونىمەن قاتار، ۇستالعاندار اراسىندا رەسەي جانە وزبەكستان ازاماتتارى دا بولعان دەگەن اقپارات تارادى.
الايدا بۇل اقپاراتقا قاتىستى قازاقستان رەسپۋبليكاسىنىڭ سىرتقى ىستەر مينيسترلىگى رەسمي مالىمدەمە جاسادى.
"قازىرگى ۋاقىتتا قازاقستان ازاماتتارىنان ەشقانداي رەسمي شاعىم تۇسكەن جوق. دەگەنمەن، قازاقستاننىڭ مىسىرداعى ەلشىلىگى ستۋدەنتتەرمەن پروفيلاكتيكالىق اڭگىمە جۇرگىزىپ، ەلدەگى كوشى-قون زاڭناماسىن ساقتاۋ قاجەتتىلىگىن ەسكەرتتى،" – دەلىنگەن مينيسترلىكتىڭ ءباسپاسوز قىزمەتى تاراتقان حابارلامادا.
