Qazaqstan Syrtqy ister mınıstrliginiń resmı ókili Aıbek Smadııarov Izraıl men HAMAS arasyndaǵy atysty toqtatý týraly kelisimderge qatysty Qazaqstannyń ustanymyn bildirdi, dep habarlaıdy "Adyrna" ulttyq portaly.
"Biz Izraıl men HAMAS arasyndaǵy atysty toqtatý týraly kelisimdi qoldaımyz. Katar, Egıpet jáne AQSh memleketteriniń ara aǵaıyndyq talpynystaryn joǵary baǵalaımyz. Bul kúsh qoldanýdy toqtatyp, kepildegilerdi bosatýǵa jáne Gaza sektoryna gýmanıtarlyq kómek jetkizýdi kúsheıtýge jasalǵan mańyzdy qadam. Qazirgi jaǵdaıda bul aýadaı qajet sharalar. Qazaqstan árdaıym beıbitshilik jaǵynda. Bul kelisimder qaqtyǵysty erte retteýge negiz bolady dep úmittenemiz", – dedi Aıbek Smadııarov.
SIM ókili Qazaqstannyń bul máselede BUU sheshimderine súıenetinin eske saldy.
"Qazaqstan Palestına-Izraıl qaqtyǵysyn «eki halyqqa eki memleket» formýlasy negizinde sheshýdi tabandy túrde qoldaıdy. Bul eki táýelsiz memleket qurýdy bildiredi. Palestındikter men ızraıldikter osy memleketterde qaýipsiz ári beıbit ómir súrýge múmkindik alýy tıis. Biz halyqaralyq qaýymdastyqtyń uzaq merzimdi beıbitshilik ornatyp, ádildik qalyptastyrýǵa baǵyttalǵan talpynystaryn qoldaýǵa daıynbyz", – dedi Aıbek Smadııarov.
Eske sala keteıik, búgin Astana ýaqyty boıynsha shamamen saǵat 14:00-de Izraıl tutqyndar tizimin alǵanyn jáne atysty resmı túrde toqtatatynyn rastady.
