Qazaqstan Syrtqy ıster ministrlıgınıŋ resmi ökılı Aibek Smadiiarov İzrail men HAMAS arasyndaǧy atysty toqtatu turaly kelısımderge qatysty Qazaqstannyŋ ūstanymyn bıldırdı, dep habarlaidy "Adyrna" ūlttyq portaly.
"Bız İzrail men HAMAS arasyndaǧy atysty toqtatu turaly kelısımdı qoldaimyz. Katar, Egipet jäne AQŞ memleketterınıŋ ara aǧaiyndyq talpynystaryn joǧary baǧalaimyz. Būl küş qoldanudy toqtatyp, kepıldegılerdı bosatuǧa jäne Gaza sektoryna gumanitarlyq kömek jetkızudı küşeituge jasalǧan maŋyzdy qadam. Qazırgı jaǧdaida būl auadai qajet şaralar. Qazaqstan ärdaiym beibıtşılık jaǧynda. Būl kelısımder qaqtyǧysty erte retteuge negız bolady dep ümıttenemız", – dedı Aibek Smadiiarov.
SIM ökılı Qazaqstannyŋ būl mäselede BŪŪ şeşımderıne süienetının eske saldy.
"Qazaqstan Palestina-İzrail qaqtyǧysyn «ekı halyqqa ekı memleket» formulasy negızınde şeşudı tabandy türde qoldaidy. Būl ekı täuelsız memleket qūrudy bıldıredı. Palestindıkter men izraildıkter osy memleketterde qauıpsız ärı beibıt ömır süruge mümkındık aluy tiıs. Bız halyqaralyq qauymdastyqtyŋ ūzaq merzımdı beibıtşılık ornatyp, ädıldık qalyptastyruǧa baǧyttalǧan talpynystaryn qoldauǧa daiynbyz", – dedı Aibek Smadiiarov.
Eske sala keteiık, bügın Astana uaqyty boiynşa şamamen saǧat 14:00-de İzrail tūtqyndar tızımın alǧanyn jäne atysty resmi türde toqtatatynyn rastady.
Ūqsas jaŋalyqtar
