دەنساۋلىق ساقتاۋ ءمينيسترى اقمارال ءالنازاروۆا باس ءمۇفتي ناۋرىزباي قاجى تاعانۇلىمەن كەزدەسۋ وتكىزدى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
قازاقستان دەنساۋلىق ساقتاۋ ءمينيسترى اقمارال ءالنازاروۆا قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلىمەن كەزدەسىپ، ۆاكتسيناتسيالاۋ جانە اعزا دونورلىعى ماسەلەلەرىن تالقىلادى.
كەزدەسۋ بارىسىندا مينيستر ۆاكتسيناتسيالاۋدىڭ ينفەكتسيالىق اۋرۋلاردان قورعاۋداعى ماڭىزدىلىعىن اتاپ ءوتتى. سوڭعى جىلدارى ەلىمىزدە دە، الەمدە دە ەكپەدەن باس تارتۋ ءۇردىسى ءوسىپ، ناتيجەسىندە ەگىلمەگەن ازاماتتاردىڭ اراسىندا ينفەكتسيالىق اۋرۋلاردىڭ تارالۋى ارتىپ كەلەدى. اقمارال ءالنازاروۆا بالالاردىڭ دەنساۋلىعىن ساقتاۋ ءۇشىن ەكپەنىڭ ماڭىزدىلىعىن ەرەكشە اتاپ ءوتتى.
مينيستر ۆاكتسيناتسيادان باس تارتۋدىڭ نەگىزگى سەبەپتەرىنىڭ ءبىرى رەتىندە اتا-انالاردىڭ ءدىني سەنىمدەرىن اتادى. وسىعان وراي، دەنساۋلىق ساقتاۋ مينيسترلىگى قازاقستان مۇسىلماندارى ءدىني باسقارماسىمەن ىنتىماقتاستىقتى نىعايتىپ، ءدىني فاكتورلاردىڭ ۆاكتسيناتسياعا اسەرىن زەرتتەۋدى جوسپارلاپ وتىر.
ترانسپلانتولوگيا سالاسىنداعى جەتىستىكتەرگە قاراماستان، اعزا دونورلىعى ماسەلەسى وزەكتى كۇيىندە قالىپ وتىر. قازىرگى ۋاقىتتا قازاقستاندا دونورلىق اعزانى كۇتۋ پاراعىندا 4117 ادام تۇر، ولاردىڭ ىشىندە 96-سى بالالار.
مينيستر قايتىس بولعاننان كەيىنگى دونورلىق ماسەلەسىن جەرگىلىكتى قاۋىمداستىقتار مەن مەشىتتەردە ءتۇسىندىرۋدىڭ ماڭىزدىلىعىن اتاپ ءوتتى. بۇل ۇدەرىستە ءدىني كوشباسشىلاردىڭ ءرولى ەرەكشە، ويتكەنى ولار حالىققا سانالى شەشىم قابىلداۋعا كومەكتەسەدى.
الەمدە قايتىس بولعاننان كەيىنگى دونورلىقتى دامىتۋدا يسپانيا كوشباسشى ەل بولىپ تابىلادى، وندا 1 ميلليون ادامعا شاققانداعى كورسەتكىش 49,38-ءدى قۇرايدى. بۇرىنعى تمد ەلدەرىنىڭ ىشىندە بەلارۋس كوش باستاپ تۇر (25,26), ال يراندا بۇل كورسەتكىش 12,57-گە تەڭ. قازاقستاندا بۇل كورسەتكىش ازىرگە 0,36 دەڭگەيىندە قالىپ وتىر.
