قازاقستاننىڭ ۇلتتىق ەكونوميكا ءمينيسترى شەتەل سانكتسياسىنا ىلىككەن ەل كومپانيالارى تۋرالى ايتتى، دەپ حابارلايدى “ادىرنا” ۇلتتىق پورتالى Zakon.kz-كە سىلتەپ.
مينيستر نۇرلان بايبازاروۆ 7 قاراشادا سانكتسياعا ىلىككەن كومپانيالار تۋرالى پىكىر ءبىلدىردى. باسشى ولاردى بىركۇندىك كومپانيالار دەپ اتادى.
نۇرلان بايبازاروۆ بۇل تىزىمدەگى ەكى كومپانيانىڭ بۇعان دەيىن امەريكالىق سانكتسيالارعا ىلىككەنىن ءتۇسىندىردى.
«بۇل كومپانيالار — بىركۇندىك فيرمالار، ولار، بالكىم، وسىنداي ماقساتتارعا اشىلادى. ءبىز ولاردى تەكسەرۋدى باستاعاندا، ولاردىڭ تولىققاندى شارۋاشىلىق ارەكەتتەرى جوق ەكەنىن بايقايمىز. ولار اشىلادى، ءبىر كەلىسىمشارت جاساسادى دا، جوق بولىپ كەتەدى. ساۋدا قالاي وتكەنىن انىق كورىپ وتىرمىز. باتىستا سانكتسيالارعا جاۋاپ بەرەتىن قارجى قىزمەتتەرى بۇل كومپانيالاردى پوستفاكتۋم تىركەپ، تىزىمگە قوسادى»، — دەپ قوستى ۇلتتىق ەكونوميكا ءمينيسترى 8 قاراشادا استانادا وتكەن ورتالىق ازيا ايماقتىق ەكونوميكالىق ىنتىماقتاستىعى مينيسترلىك كونفەرەنتسياسىنىڭ كۋلۋارىندا.
2024 جىلدىڭ 7 قاراشاسىندا ۇلىبريتانيا رەسەيدىڭ اسكەري-ونەركاسىپ كەشەنىنە قارسى جاڭا سانكتسيالار ەنگىزگەنىن جاريالاعان ەدى. بريتان ۇكىمەتىنىڭ سايتىندا بۇل سانكتسيالاردىڭ 2023 جىلدىڭ مامىر ايىنان بەرگى ەڭ ءىرى پاكەتى ەكەنى، ونىڭ ۋكرايناداعى اسكەري ارەكەتتەرگە بايلانىستى رەسەيگە باعىتتالعانى كورسەتىلگەن. بۇل سانكتسيالار قازاقستان، قىتاي جانە تۇركيا كومپانيالارىن قامتيتىن 56 نىساندى قامتىدى. اتاپ ايتقاندا، سانكتسيالار تىزىمىنە التى قازاقستاندىق كومپانيا ەندى.
«قازاقستاندىق كومپانيالار سانكتسيالاردى اينالىپ وتۋگە تىرىسادى. بۇل ءارتۇرلى كومپانيالار، ولار پايدا تابۋدى كوزدەيدى. ونىمەن كۇرەسۋ قيىن»، — دەدى نۇرلان بايبازاروۆ.
