5-سىنىپ وقۋلىعىنان داۋ تۋىپ، مينيسترلىك جاعدايعا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
Facebook جەلىسىندە ورىس مەكتەپتەرىنە ارنالعان ورىس ءتىلى مەن ادەبيەتى وقۋلىعى تۋرالى پىكىر جاريالاندى.
"ورىس ءتىلى مەن ادەبيەتى وقۋلىعى. 5 سىنىپ. اۆتورى جانپەيسوۆا ۋ.ا. 2-ءبولىم، 16-بەت. قازاق حالىق ەرتەگىسىن وقيىق! بىزدە جوشى ەمەس حۋساين دەگەن حان بولىپتى، وعان بالاسىنىڭ قازاسىن جەتكىزگەن كەتبۇعا ەمەس، الي دەگەن كۇيشى بولىپتى-مىس. قالاي بۇل؟" - دەدى ول.
رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعى جاعدايعا قاتىستى پىكىر ءبىلدىردى.
"5-سىنىپقا ارنالعان «اتامۇرا» باسپاسىنىڭ «ورىس ءتىلى مەن ادەبيەتى» وقۋلىعى 5-9 سىنىپتارعا ارنالعان «ورىس ءتىلى مەن ادەبيەتى» ۇلگىلىك وقۋ باعدارلاماسىنا سايكەس ازىرلەنگەن. باعدارلامانىڭ مازمۇنىنا سايكەس، وقۋشىلاردىڭ مىندەتتى تۇردە وقۋى ءتيىس شىعارمالار ءتىزىمى انىقتالعان، ولاردىڭ ىشىندە قازاق حالىق ەرتەگىسى «ماستەر الي» دە بار. وسى تالاپتى ورىنداۋ ماقساتىندا، اتالعان شىعارما قازىرگى قولدانىستاعى وقۋلىققا ەنگىزىلگەن.
«ماستەر الي» – ويدان شىعارىلعان وقيعالار مەن كەيىپكەرلەرگە نەگىزدەلگەن قازاق حالىق ەرتەگىسى. بۇل شىعارمانىڭ مازمۇنىندا ناقتى تاريحي تۇلعالار – جوشى حان مەن كەتبۇعا كەزدەسپەيدى. دەگەنمەن، باسىلىم اۆتورلارى «ماستەر الي» ەرتەگىسىن «اقساق قۇلان» اڭىزى سياقتى ناقتى تاريحي وقيعالار مازمۇنىنا ۇقساتىپ، شىعارما رەتىندە قاراستىرعان. سونداي-اق، 5-سىنىپتىڭ وقۋ باعدارلاماسىندا اڭىزداردى فولكلوردىڭ جەكە جانرى رەتىندە وقىتۋ قاراستىرىلماعانىن ەسكەرۋ قاجەت.
«ماستەر الي» ەرتەگىسى «زولوتوي كۋۆشين» (1952), «مۋزىكا-كۋدەسنيتسا» (1987) سياقتى جيناقتاردا باسىلىپ شىققان", - دەلىنگەن رەسمي جاۋاپتا.
ال مينيسترلىك وكىلدەرى بۇل وقۋلىق ورتا ءبىلىم بەرۋدىڭ 5-9 سىنىپتارىنا ارنالعان «ورىس ءتىلى مەن ادەبيەتى» ءپانى بويىنشا ۇلگىلىك وقۋ باعدارلاماسىنىڭ تالاپتارىنا سايكەس ازىرلەنگەنىن ايتادى.
"بۇل باعدارلاما ورىس ءتىلى وقىتىلمايتىن مەكتەپتەر ءۇشىن جاسالعان جانە وندا مىندەتتى تۇردە وقىلاتىن شىعارمالاردىڭ ءتىزىمى بەكىتىلگەن. وسى تىزىمگە «ءالي شەبەر» (ماستەر الي) اتتى قازاق حالىق ەرتەگىسى دە كىرەدى. سوندىقتان بۇل شىعارما اتالعان وقۋلىققا ەنگىزىلگەن. «ءالي شەبەر» – قازاق حالىق ەرتەگىسى، اۋىز ادەبيەتىنىڭ جانرىنا جاتاتىن شىعارما. ەرتەگىنىڭ سيۋجەتى ويدان شىعارىلعان كەيىپكەرلەر مەن وقيعالارعا نەگىزدەلگەن. بۇل ەرتەگىدە جوشى حان مەن كەتبۇقا سياقتى ناقتى تاريحي تۇلعالار كەزدەسپەيدى. جاريالانعان سىن ماقالالاردىڭ اۆتورلارى «ءالي شەبەر» ەرتەگىسى مەن ناقتى تاريحي وقيعالار مەن تۇلعالار تۋرالى باياندايتىن «اقساق قۇلان» اڭىزىن شاتاستىرعان. ايتا كەتۋ كەرەك، 5-سىنىپتىڭ وقۋ باعدارلاماسىندا اڭىزداردى فولكلوردىڭ جەكە جانرى رەتىندە وقىتۋ قاراستىرىلماعان", - دەدى.
