اقش مەملەكەتتىك دەپارتامەنتىنىڭ TechWomen باعدارلاماسىنىڭ تۇلەگى، قازاقستاندىق ساياساتتانۋشى دينا شايحيسلام اقش-تىڭ سايلانعان پرەزيدەنتى دونالد ترامپتىڭ ۇلىقتاۋ راسىمىنە قاتىسادى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
دينا شايحيسلام بۇل جاڭالىقتى ءوزىنىڭ Instagram پاراقشاسىندا ءبولىستى.
"بۇگىن مەن پرەزيدەنت ترامپ پەن ۆيتسە-پرەزيدەنت ۆەنستىڭ يناۋگۋراتسياسىنا رەسمي شاقىرۋ الدىم", – دەپ جازدى ول، شاقىرۋ قاعازىن كورسەتىپ.
دينا شايحيسلام – الەمدەگى جەتەكشى ساياسي ستراتەگتەر مەن كەڭەسشىلەردىڭ ءبىرى. ول حالىقارالىق سايلاۋ ناۋقاندارىن ۇيىمداستىرۋعا قاتىسىپ، ءىرى كومپانيالارعا جاھاندىق نارىقتارعا شىعۋ جونىندە كەڭەس بەرەدى. نازارباەۆ ۋنيۆەرسيتەتىنىڭ ۇزدىك تۇلەكتەرىنىڭ ءبىرى رەتىندە ول ءبىلىم مەن بالالاردى دامىتۋ سالاسىنا ۇلەس قوسىپ، CDF قوعامدىق قورىنىڭ نەگىزىن قالاعان.
اقش-تىڭ جاڭادان سايلانعان پرەزيدەنتى دونالد ترامپ يناۋگۋراتسياسىن كاپيتولي عيماراتىندا وتكىزۋ تۋرالى شەشىم قابىلدادى. بۇل ءداستۇرلى اشىق الاڭدا وتكىزىلەتىن راسىمنەن ەرەكشەلەنەدى. پرەزيدەنت اۋا رايىنىڭ قولايسىزدىعىن جانە ءوز جاقتاستارىنىڭ دەنساۋلىعىن ويلاعانىن اتاپ ءوتتى.
