گارۆارد ۋنيۆەرسيتەتى بەيسەنبى كۇنى شەتەلدىك ستۋدەنتتەردىڭ اقش-قا كىرۋىنە سالىنعان تىيىمعا بايلانىستى فەدەرالدىق سوتقا شاعىم ءتۇسىردى، دەپ حابارلايدى “ادىرنا”.
ارىز اقش پرەزيدەنتى دونالد ترامپ شەتەل ازاماتتارىنىڭ گارۆاردتا وقۋعا كەلۋىنە تىيىم سالۋ تۋرالى جارلىققا قول قويعاننان كەيىن 24 ساعات وتپەي ءتۇسىرىلدى. ۋنيۆەرسيتەت اكىمشىلىكتىڭ بۇل ارەكەتى بۇعان دەيىنگى سوت شەشىمىن اينالىپ وتۋگە باعىتتالعانىن مالىمدەدى. ول شەشىم اقش-تىڭ ىشكى قاۋىپسىزدىك مينيسترلىگىنە گارۆاردقا شەتەلدىك ستۋدەنتتەردىڭ قابىلدانۋىنا كەدەرگى جاساۋعا تىيىم سالعان بولاتىن.
"پرەزيدەنتتىڭ بۇل ارەكەتى اقش مۇددەسىن قورعاۋعا ەمەس، ۇكىمەتتىڭ گارۆاردقا قارسى كەك قايتارۋىن جالعاستىرۋعا باعىتتالعان", – دەلىنگەن سوتقا بەرىلگەن تالاپ-ارىزدا.
گارۆارد ۋنيۆەرسيتەتىنىڭ پرەزيدەنتى الان گاربەر: "شەتەلدىك ستۋدەنتتەردى قابىلداۋ جانە الەمدەگى باسقا دا وقۋ ورىندارىمەن ارىپتەستىك ورناتۋ ماسەلەسىندە ۋنيۆەرسيتەتكە ەرەكشە كوزقاراس تانىتۋ – بۇل اكىمشىلىكتىڭ گارۆاردتان كەك قايتارۋعا باعىتتالعان تاعى ءبىر زاڭسىز ارەكەتى", – دەدى تالاپ-ارىز تۇسكەن سوڭ.
سونداي-اق، ول ۋنيۆەرسيتەت شەتەلدىك ستۋدەنتتەر مەن زەرتتەۋشىلەردىڭ بيىلعى جازدا جانە كەلەسى وقۋ جىلىندا وقۋىن ءارى قاراي جالعاستىرا الۋى ءۇشىن "بالامالى جوسپارلار" ازىرلەپ جاتقانىن جەتكىزدى.
