قازاقستاندا بەنزين مەن ديزەل وتىنىنا ارنالعان مەملەكەتتىك باعا رەتتەۋىنەن باس تارتىلۋى مۇمكىن، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
«قازىرگى ۋاقىتتا قازاقستانداعى بەنزين مەن ديزەل وتىنىنىڭ باعاسى الەمدەگى ەڭ تومەن باعالاردىڭ قاتارىندا. بۇل باعا ايىرماشىلىعى كورشى ەلدەرمەن سالىستىرعاندا ۇلكەن ايىرماشىلىققا اكەلۋدە. مىسالى، قازاقستاندا اي-92 بەنزينى ليترىنە 205 تەڭگە، رەسەيدە – 288 تەڭگە، قىرعىزستاندا – 385 تەڭگە، وزبەكستاندا – 489 تەڭگە.
ديزەل وتىنى قازاقستاندا ليترىنە 295 تەڭگە، رەسەيدە – 355 تەڭگە، قىرعىزستاندا – 427 تەڭگە، وزبەكستاندا – 528 تەڭگە. وسىلايشا، اي-92 بەنزينىنىڭ باعاسىندا 40%-دان 138%-عا دەيىن، ديزەل وتىنىنىڭ باعاسىندا 20%-دان 79%-عا دەيىن ايىرماشىلىق بار. بۇل تاپشىلىققا، سالانى جاڭعىرتۋ مۇمكىندىگىنىڭ بولماۋىنا، جانار-جاعارمايدىڭ زاڭسىز ەكسپورتتالۋىنا سەبەپ بولىپ وتىر»، – دەپ ءتۇسىندىردى ەنەرگەتيكا مينيسترلىگى.
ەنەرگەتيكا مينيسترلىگى «تۇراقتى باعا قالىپتاستىرۋ مودەلى ساياساتىن ەنگىزۋگە كوشۋىن» مالىمدەپ، بۇل ساياسات سۇرانىس پەن ۇسىنىس اراسىنداعى نارىقتىق تەڭگەرىمدى ورناتۋعا، وتىن تاپشىلىعىن جويۋعا، مۇناي وڭدەۋ سالاسىن جاڭعىرتۋدى ىنتالاندىرۋعا، جاڭا جۇمىس ورىندارىن قۇرۋعا جانە ۇزاق مەرزىمدى ينۆەستيتسيالار تارتۋعا باعىتتالعاننىن ايتتى.
«بۇل ساياساتتىڭ نەگىزگى قاعيدالارى وزگەرىستەردىڭ بىرتىندەپ جانە بولجامدى تۇردە بولۋىن قامتاماسىز ەتۋ. ازاماتتاردىڭ مۇددەسىن قورعاۋ ءۇشىن الەۋمەتتىك قولداۋ شارالارى جالعاسىن تابادى. ال اۋىلشارۋاشىلىق وندىرۋشىلەرىنە ديزەل وتىنىنا كەپىلدى قولجەتىمدىلىك ۇسىنىلادى، ونى اشىق سحەمالار بويىنشا جانە قولايلى باعامەن الۋعا مۇمكىندىك بەرىلەدى. ەنەرگەتيكا مينيسترلىگى باسقا مۇددەلى مەملەكەتتىك ورگاندارمەن بىرلەسىپ، نارىقتاعى باقىلاۋدى كۇشەيتىپ، زاڭناما تالاپتارىنىڭ ورىندالۋىن قامتاماسىز ەتەدى جانە ىشكى نارىققا وتىن جەتكىزىلىمىنىڭ ۇزدىكسىز بولۋىن باقىلاۋدا ۇستايدى»، – دەپ مالىمدەدى مينيسترلىك.
