Qazaqstanda benzın men dızel otynyna arnalǵan memlekettik baǵa retteýinen bas tartylýy múmkin, dep habarlaıdy “Adyrna” ulttyq portaly QazTAG agenttigine siltep.
«Qazirgi ýaqytta Qazaqstandaǵy benzın men dızel otynynyń baǵasy álemdegi eń tómen baǵalardyń qatarynda. Bul baǵa aıyrmashylyǵy kórshi eldermen salystyrǵanda úlken aıyrmashylyqqa ákelýde. Mysaly, Qazaqstanda AI-92 benzıni lıtrine 205 teńge, Reseıde – 288 teńge, Qyrǵyzstanda – 385 teńge, Ózbekstanda – 489 teńge.
Dızel otyny Qazaqstanda lıtrine 295 teńge, Reseıde – 355 teńge, Qyrǵyzstanda – 427 teńge, Ózbekstanda – 528 teńge. Osylaısha, AI-92 benzıniniń baǵasynda 40%-dan 138%-ǵa deıin, dızel otynynyń baǵasynda 20%-dan 79%-ǵa deıin aıyrmashylyq bar. Bul tapshylyqqa, salany jańǵyrtý múmkindiginiń bolmaýyna, janar-jaǵarmaıdyń zańsyz eksporttalýyna sebep bolyp otyr», – dep túsindirdi energetıka mınıstrligi.
Energetıka mınıstrligi «turaqty baǵa qalyptastyrý modeli saıasatyn engizýge kóshýin» málimdep, bul saıasat suranys pen usynys arasyndaǵy naryqtyq teńgerimdi ornatýǵa, otyn tapshylyǵyn joıýǵa, munaı óńdeý salasyn jańǵyrtýdy yntalandyrýǵa, jańa jumys oryndaryn qurýǵa jáne uzaq merzimdi ınvestıııalar tartýǵa baǵyttalǵannyn aıtty.
«Bul saıasattyń negizgi qaǵıdalary ózgeristerdiń birtindep jáne boljamdy túrde bolýyn qamtamasyz etý. Azamattardyń múddesin qorǵaý úshin áleýmettik qoldaý sharalary jalǵasyn tabady. Al aýylsharýashylyq óndirýshilerine dızel otynyna kepildi qoljetimdilik usynylady, ony ashyq shemalar boıynsha jáne qolaıly baǵamen alýǵa múmkindik beriledi. Energetıka mınıstrligi basqa múddeli memlekettik organdarmen birlesip, naryqtaǵy baqylaýdy kúsheıtip, zańnama talaptarynyń oryndalýyn qamtamasyz etedi jáne ishki naryqqa otyn jetkiziliminiń úzdiksiz bolýyn baqylaýda ustaıdy», – dep málimdedi mınıstrlik.
