Қазақстанда бензин мен дизель отынына арналған мемлекеттік баға реттеуінен бас тартылуы мүмкін, деп хабарлайды “Адырна” ұлттық порталы ҚазТАГ агенттігіне сілтеп.
«Қазіргі уақытта Қазақстандағы бензин мен дизель отынының бағасы әлемдегі ең төмен бағалардың қатарында. Бұл баға айырмашылығы көрші елдермен салыстырғанда үлкен айырмашылыққа әкелуде. Мысалы, Қазақстанда АИ-92 бензині литріне 205 теңге, Ресейде – 288 теңге, Қырғызстанда – 385 теңге, Өзбекстанда – 489 теңге.
Дизель отыны Қазақстанда литріне 295 теңге, Ресейде – 355 теңге, Қырғызстанда – 427 теңге, Өзбекстанда – 528 теңге. Осылайша, АИ-92 бензинінің бағасында 40%-дан 138%-ға дейін, дизель отынының бағасында 20%-дан 79%-ға дейін айырмашылық бар. Бұл тапшылыққа, саланы жаңғырту мүмкіндігінің болмауына, жанар-жағармайдың заңсыз экспортталуына себеп болып отыр», – деп түсіндірді энергетика министрлігі.
Энергетика министрлігі «тұрақты баға қалыптастыру моделі саясатын енгізуге көшуін» мәлімдеп, бұл саясат сұраныс пен ұсыныс арасындағы нарықтық теңгерімді орнатуға, отын тапшылығын жоюға, мұнай өңдеу саласын жаңғыртуды ынталандыруға, жаңа жұмыс орындарын құруға және ұзақ мерзімді инвестициялар тартуға бағытталғаннын айтты.
«Бұл саясаттың негізгі қағидалары өзгерістердің біртіндеп және болжамды түрде болуын қамтамасыз ету. Азаматтардың мүддесін қорғау үшін әлеуметтік қолдау шаралары жалғасын табады. Ал ауылшаруашылық өндірушілеріне дизель отынына кепілді қолжетімділік ұсынылады, оны ашық схемалар бойынша және қолайлы бағамен алуға мүмкіндік беріледі. Энергетика министрлігі басқа мүдделі мемлекеттік органдармен бірлесіп, нарықтағы бақылауды күшейтіп, заңнама талаптарының орындалуын қамтамасыз етеді және ішкі нарыққа отын жеткізілімінің үздіксіз болуын бақылауда ұстайды», – деп мәлімдеді министрлік.
