پرەزيدەنتتىڭ ءباسپاسوز حاتشىسى شەرزود اسادوۆ اۋعانستانداعى جاعداي جانە وزبەكستان شەكاراسىن بۇزعان اۋعاندىقتار تۋرالى ايتتى، دەپ حابارلايدى "ادىرنا".
"2021 جىلدىڭ 23 ماۋسىمىنان باستاپ اۋعانستان قارۋلى ادامدارى بىرنەشە رەت وزبەكستان شەكاراسىنان زاڭسىز وتۋگە تىرىستى. ولاردىڭ جالپى سانى بۇگىندە 150 ادامعا جەتتى جانە ولاردىڭ بارلىعى حالىقارالىق زاڭدارعا سايكەس تەرگەۋ، جاۋاپ الۋ شارالارىن وتكىزگەننەن كەيىن جىبەرىلدى", دەدى اسادوۆ.
مەملەكەت باسشىسىنىڭ ءباسپاسوز حاتشىسىنىڭ سوزىنە قاراعاندا، قازىرگى ۋاقىتتا اۋعانستاننىڭ بىردە-ءبىر ازاماتى وزبەكستان اۋماعىندا زاڭسىز باسپانا العان جوق جانە وزبەكستان شەكاراسى بۇعان بەي-جاي قاراماسى انىق. وزبەكستان بولاشاقتا ءوز اۋماعىنا زاڭسىز كىرۋگە جول بەرمەيدى.
«وزبەكستان اۋعانستانداعى جاعدايعا الاڭداۋشىلىق بىلدىرەتىنى ءسوزسىز. ءبىز ەكى مەملەكەت اراسىنداعى تاتۋ كورشىلىك قاتىناستاردىڭ ودان ءارى دامۋىنا مۇددەلىمىز جانە وسى مەملەكەتتىڭ ىشكى ىستەرىنە ارالاسپاۋدى قولدايمىز»، - دەپ قوستى اسادوۆ.
اۋعانستانداعى اسكەري جاعداي 2021 جىلى مامىردا اقش پەن ونىڭ وداقتاستارى ءوز اسكەرلەرىن ەلدەن شىعارا باستاعان كەزدە كۇرت ناشارلادى. تاليبان سودىرلارى شابۋىلعا شىقتى. قازىرگى ۋاقىتتا ولار اۋىلدىق جەرلەردەگى ماڭىزدى اۋماقتاردى يەلەنىپ، ءىرى قالالارعا شابۋىل جاساي باستادى.
"ادىرنا" ۇلتتىق پورتالى
