2024 جىلدىڭ جەلتوقسانىندا قازاقستاندا ينفلياتسيا دەڭگەيى ايتارلىقتاي جوعارىلاعان. استانادا جىلدىق ينفلياتسيا 10,7%-دى قۇراسا، قاراعاندى وبلىسىندا بۇل كورسەتكىش 9,6%-عا جەتكەن. جالپى ەل بويىنشا ينفلياتسيا دەڭگەيىنىڭ ءوسۋى 10 وڭىردە بايقالدى، دەپ حابارلايدى "ادىرنا" ۇلتتىق پورتالى.
2023 جىلدىڭ سوڭىندا قازاقستاندا جىلدىق ينفلياتسيا 8,6%-دى قۇرادى. بۇل كورسەتكىش وتكەن جىلمەن سالىستىرعاندا جەدەلدەگەنىن كورسەتەدى. ازىق-تۇلىك باعاسى جىلدىق ماندە 5,5%-عا قىمباتتادى، اسىرەسە، جەتىسۋ مەن تۇركىستان وبلىستارىندا باعانىڭ ەداۋىر ءوسۋى تىركەلدى.
تۇركىستان وبلىسىندا ازىق-تۇلىككە جاتپايتىن تاۋارلار دا قىمباتتاپ، ايتارلىقتاي ءوسىم بايقالدى. ەڭ تومەنگى ينفلياتسيا پاۆلودار وبلىسىندا تىركەلىپ، 5,3%-دى قۇرادى.
2024 جىلدىڭ جەلتوقسانىندا ايلىق ينفلياتسيا 0,9%-عا ءوستى. بۇل بۇعان دەيىنگى ورتاشا ماندەردەن جوعارى. باعانىڭ ءوسۋى اسىرەسە ازىق-تۇلىك جانە تۇرمىستىق قاجەتتى تاۋارلاردا ايقىن بايقالدى.
بۇل تۋرالى دەپۋتات داۋلەت مۇقاەۆ ءوز پاراقشاسىندا جازدى.
"قىمباتشىلىق بەتىمەن كەتىپ بارادى. مىناۋ استاناداعى كارتوپ باعاسى. ال انتيمونوپوليالىق كوميتەت جۇمىسى 0. ارزان دەپ جۇرگەن ماگنۋم وزىندە وسىنداي باعا. وسى كەزگە دەيىن كەلىسى 150-180 تەڭگەدەن ەدى. قىمباتتاعانى كارتوپ قانا ەمەس. وسپەي جاتقانى ايلىق قانا...
ءبىزدىڭ ەلدە ونسىز دا ورتاشا جالاقىنىڭ 52-56% تەك قانا ازىق-تۇلىككە كەتۋدە. ەكونوميكاسى ناشار افريكا ەلدەرىمەن پارا-پار: نيگەريا ەلى 59%، ميانما (56,6%), كەنيا 56,1%، بانگلادەش (52,7%), لاوس (50,6%) ال انگولا 49,7% جۇمسايدى. 105 ەلدىڭ ىشىندە سوڭعى قاتاردامىز.
ال اقش ورتاشا ايلىقتىڭ 6,7%، سينگاپۋر حالقى بولسا 8,4%، بريتاندىقتار 8,7% اقشاسىن تاماققا جۇمسايدى. سوعىس بولىپ جاتقان رەسەيدىڭ وزىندە 29%، ال ۋكراينادا 41,6% ەكەن. سونىمەن قاتار بەلارۋس حالقى — 32,1%، تۋركمەنستان بولسا 36,9%، ال وزبەكتەر 46,5% اقشاسىن ازىق-تۇلىككە جاراتادى", - دەپ جازدى ول.
