پەتروپاۆلدا ەر ادام كولىگىن 5 مينۋتتان ارتىق قىزدىرعانى ءۇشىن ايىپپۇل تولەۋگە ءماجبۇر بولدى، دەپ حابارلايدى "ادىرنا" ۇلتتىق پورتالى.
بۇل تۋرالى پوليتسياعا كورشىسى حابارلاعان. ناتيجەسىندە كولىك يەسىنە 5 اەك (19 660 تەڭگە) ايىپپۇل سالىندى.
بۇل جاعداي ءوڭىر تۇرعىندارى اراسىندا قىزۋ تالقىلاندى. سەبەبى اۋا تەمپەراتۋراسى كەيدە -40 گرادۋسقا دەيىن تومەندەيتىن ايماقتا كولىكتى 5 مينۋتتا جىلىتۋ قيىن.
ىشكى ىستەر دەپارتامەنتى بۇل تالاپتىڭ جاڭالىق ەمەس ەكەنىن، جول ءجۇرىسى قاعيدالارىنىڭ 20 جىلدان بەرى بار بولىگى ەكەنىن ءتۇسىندىردى. ولاردىڭ مالىمەتىنشە، ەگەر كولىك قوزعالتقىشى قوسۋلى كۇيدە 5 مينۋتتان ارتىق تۇرسا جانە بۇل تۇرعىندارعا قولايسىزدىق تۋدىرسا، كولىك يەسىنە اكiمشiلiك قۇقىق بۇزۋشىلىق تۋرالى 597-بابىنىڭ 1-بولىگى “كولiك قۇرالدارىن توقتاتۋ نەمەسە توقتاپ تۇرۋ قاعيدالارىن بۇزۋ” بويىنشا ايىپپۇل سالىنادى.
سولتۇستىك قازاقستان وبلىسىنىڭ پوليتسيا دەپارتامەنتى مۇنداي ايىپپۇلداردىڭ جاپپاي سالىنبايتىنىن، تەك تۇرعىنداردان شاعىم ءتۇسىپ، جەتكىلىكتى دالەلدەر بولعان جاعدايدا عانا شارا قولدانىلاتىنىن ايتتى.
ەسكە سالا كەتەيىك، بۇعان دەيىن كولىكتى 5 مينۋتتان ارتىق قىزدىرعاندارعا 19 مىڭ تەڭگە ايىپپۇل سالىناتىنى تۋرالى جازعان ەدىك.
15 قاڭتار كۇنى ماجىلىستە كولىكتى 5 مينۋتتان ارتىق قىزدىرعانى ءۇشىن ايىپپۇل سالۋ نورماسىن ورتالىق جانە سولتۇستىك وڭىرلەردىڭ كليماتتىق ەرەكشەلىكتەرىن ەسكەرە وتىرىپ، ادىلەتتى جولدارىن قاراستىرۋ ۇسىنىلدى.
