2025 جىلعى 13 قاڭتاردا وزبەكستاندا «عارىشتىق قىزمەت تۋرالى» زاڭ قابىلداندى، دەپ حابارلايدى "ادىرنا" ۇلتتىق پورتالى «نورما» قۇقىقتىق پورتالىنا سىلتەمە جاساپ.
قۇجات عارىش سالاسىنداعى قىزمەتتىڭ نەگىزگى باعىتتارىن، ماقساتتارى مەن پرينتسيپتەرىن انىقتاپ، وسى سالاعا جاۋاپتى ورگانداردىڭ وكىلەتتىكتەرىن بەلگىلەيدى.
زاڭنىڭ باستى ماقساتى – ەلدىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋ، قورعانىس قابىلەتى مەن قاۋىپسىزدىگىن نىعايتۋ، جەر مەن عارىش كەڭىستىگىن زەرتتەۋ جانە عىلىمي ءبىلىمدى دامىتۋ. سونىمەن قاتار، عارىشتىق تەحنولوگيالاردى پايدالانۋ ارقىلى سالالاردى تسيفرلاندىرۋدى جەدەلدەتۋ، عىلىمي، الەۋمەتتىك، ەكونوميكالىق جانە ەكولوگيالىق زەرتتەۋلەر جۇرگىزۋ كوزدەلگەن.
زاڭعا سايكەس، ارنايى ۋاكىلەتتى ورگان رەتىندە «وزبەكعارىش» اگەنتتىگى بەلگىلەنىپ، وعان تسيفرلىق تەحنولوگيالار مينيسترلىگى باسشىلىق ەتەدى. قۇجاتتا مينيسترلەر كابينەتىنىڭ، تسيفرلىق تەحنولوگيالار مينيسترلىگىنىڭ جانە قورعانىس مينيسترلىگىنىڭ مىندەتتەرى كورسەتىلگەن. سونىمەن قاتار، سپۋتنيكتەردى پايدالانۋ، عارىشتىق-زىمىران كەشەندەرىن قولدانۋ، عارىش نىساندارىن ۋتيليزاتسيالاۋ، دەنساۋلىقتى، قورشاعان ورتانى جانە مۇلىكتى قورعاۋ سياقتى نەگىزگى ەرەجەلەر قامتىلعان.
مينيسترلىكتەر مەن ۆەدومستۆولار جىل سايىن 20 شىلدەگە دەيىن عارىشتىق قىزمەتتەرگە قاجەتتىلىكتەر تۋرالى ەسەپ بەرۋى ءتيىس. ەسەپتە قىزمەت كولەمى، ورىندالۋ مەرزىمى مەن كەزەڭدىلىگى كورسەتىلەدى.
زاڭ «نارودنوە سلوۆو» گازەتىندە جاريالانىپ، 2025 جىلعى 15 قاڭتاردا كۇشىنە ەندى.
