2025 жылғы 13 қаңтарда Өзбекстанда «Ғарыштық қызмет туралы» заң қабылданды, деп хабарлайды "Адырна" ұлттық порталы «Норма» құқықтық порталына сілтеме жасап.
Құжат ғарыш саласындағы қызметтің негізгі бағыттарын, мақсаттары мен принциптерін анықтап, осы салаға жауапты органдардың өкілеттіктерін белгілейді.
Заңның басты мақсаты – елдің тұрақты әлеуметтік-экономикалық дамуын қамтамасыз ету, қорғаныс қабілеті мен қауіпсіздігін нығайту, Жер мен ғарыш кеңістігін зерттеу және ғылыми білімді дамыту. Сонымен қатар, ғарыштық технологияларды пайдалану арқылы салаларды цифрландыруды жеделдету, ғылыми, әлеуметтік, экономикалық және экологиялық зерттеулер жүргізу көзделген.
Заңға сәйкес, арнайы уәкілетті орган ретінде «Өзбекғарыш» агенттігі белгіленіп, оған Цифрлық технологиялар министрлігі басшылық етеді. Құжатта Министрлер кабинетінің, цифрлық технологиялар министрлігінің және қорғаныс министрлігінің міндеттері көрсетілген. Сонымен қатар, спутниктерді пайдалану, ғарыштық-зымыран кешендерін қолдану, ғарыш нысандарын утилизациялау, денсаулықты, қоршаған ортаны және мүлікті қорғау сияқты негізгі ережелер қамтылған.
Министрліктер мен ведомстволар жыл сайын 20 шілдеге дейін ғарыштық қызметтерге қажеттіліктер туралы есеп беруі тиіс. Есепте қызмет көлемі, орындалу мерзімі мен кезеңділігі көрсетіледі.
Заң «Народное слово» газетінде жарияланып, 2025 жылғы 15 қаңтарда күшіне енді.
