وزبەكستاننىڭ زاڭ شىعارۋ پالاتاسى 7 شىلدەدە وتكەن پلەنارلىق وتىرىستا لاتىن گرافيكاسىنا نەگىزدەلگەن وزبەك ءالىپبيىن وزگەرتۋ تۋرالى زاڭدى قابىلدادى، دەپ حابارلايدى «ادىرنا» ءتىلشىسى gazeta.uz-عا سىلتەمە جاساپ.
قۇجات دەپۋتاتتار تاراپىنان ءۇش وقىلىمدا بىردەن، قارسى داۋىسسىز ماقۇلدانىپ، سەنات قاراۋىنا جىبەرىلگەن.
تۇزەتۋلەرگە سايكەس، لاتىن گرافيكاسىنداعى وزبەك ءالىپبيى قازىرگى 26 ءارىپ پەن ءۇش ارىپتىك تىركەستىڭ ورنىنا 28 ءارىپ پەن ءبىر اپوستروفتان تۇرادى.
ۇسىنىلعان وزگەرىستەر بويىنشا قازىر ەكى تاڭبامەن بەرىلەتىن ءتورت ءارىپ ءبىر تاڭبامەن جازىلادى. اتاپ ايتقاندا، «Sh» ورنىنا – «Ş»، «Ch» ورنىنا – «Ç»، «Oʻ» ورنىنا – «Ö»، ال «Gʻ» ورنىنا – «Ğ» قولدانىلادى. قالعان ارىپتەر وزگەرىسسىز قالادى.
تالقىلاۋ بارىسىندا دەپۋتاتتار جاڭا نورمالاردى كەزەڭ-كەزەڭىمەن ءارى ءتيىمدى ەنگىزۋگە باعىتتالعان ۇسىنىستار ايتتى. اتاپ ايتقاندا، زاڭ كۇشىنە ەنگەنگە دەيىن بۇرىن راسىمدەلگەن قۇجاتتاردىڭ، ۇلتتىق ۆاليۋتانىڭ جانە باعالى قاعازداردىڭ زاڭدىق كۇشى ساقتالۋى ۇسىنىلدى.
سونداي-اق مەملەكەتتىك ورگاندار مەن ۇيىمداردىڭ رەسمي رامىزدەرىن، ماڭدايشالارىن، كورسەتكىشتەرىن جانە وزگە دە اتريبۋتتارىن بەلگىلەنگەن مەرزىمگە دەيىن قولدانۋعا مۇمكىندىك بەرۋ كوزدەلگەن.
زاڭ شىعارۋ پالاتاسىنىڭ مالىمەتىنشە، بۇل ءتاسىل قۇجاتتاردى، بلانكىلەردى، ماڭدايشالاردى، كورسەتكىشتەردى جانە باسقا دا ماتەريالدىق تاسىمالداۋشىلاردى ءبىر مەزەتتە اۋىستىرۋ قاجەتتىلىگىن بولدىرمايدى. ناتيجەسىندە مەملەكەتتىك بيۋدجەتتەن نەگىزسىز شىعىنداردىڭ الدىن الىپ، رەفورمانى قارجىلىق تۇرعىدان قولايلى تۇردە جۇزەگە اسىرۋعا مۇمكىندىك بەرەدى.
پارلامەنت دەپۋتاتتارىنىڭ پىكىرىنشە، زاڭ جوباسىنىڭ قابىلدانۋى لاتىن گرافيكاسىنداعى وزبەك ءالىپبيى مەن ەملە ەرەجەلەرىن ودان ءارى جەتىلدىرۋگە، مەملەكەتتىك ءتىلدىڭ قولدانىلۋ اياسىن كەڭەيتۋگە جانە ونى تسيفرلاندىرۋعا ىقپال ەتەدى.
ايتا كەتەيىك، ءالىپبي رەفورماسىنا قاتىستى زاڭ جوباسى قوعامدىق تالقىلاۋعا شىعارىلمادى.
