ۇلتتىق مۋزىكا ونەرىنىڭ بەسىگى – جامبىل اتىنداعى قازاق مەملەكەتتىك فيلارمونياسىنىڭ قۇرىلعانىنا 90 جىل تولدى.
1935 جىلى 14 قاڭتاردا قازاق كسر حالىق كوميسسارلار كەڭەسىنىڭ قاۋلىسىمەن قازاق مەملەكەتتىك فيلارمونياسىنىڭ قۇرىلۋىنا ابدەن قيسىندى تۇردە اكەلىپ سوقتىرعان ۇلتتىق ونەر ۇجىمدارىنىڭ، اعارتۋشىلىق جانە كونتسەرتتىك ءىس-شارالاردىڭ قۇرىلۋى جان-جاقتى قولداۋ تاپتى. ال 1938 جىلى وعان جامبىل جاباەۆتىڭ ەسىمى بەرىلدى.
فيلارمونيانىڭ العاشقى ديرەكتورى جانە كوركەمدىك جەتەكشىسى – كورنەكتى مۋزىكاتانۋشى، كومپوزيتور، ديريجەر، قازاق كسر-ءنىڭ حالىق ءارتىسى، قازاق كسر عىلىم اكادەمياسىنىڭ اكادەميگى، قوعام جانە مەملەكەت قايراتكەرى، قازاق ءتىلى بويىنشا تاماشا مونوگرافيالاردىڭ اۆتورى احمەت جۇبانوۆ بولدى.
فيلارمونيا قۇرامىنا سول كەزدە قازاق واك اتىنداعى ۇلتتىق وركەستر (1939 جىلى مەملەكەتتىك حور كاپەللاسى بولىپ قايتا قۇرىلعان) دەپ اتالاتىن دومبىرا وركەسترى، ۇلتتىق حور، بي ءانسامبلى جانە انشىلەر مەن حالىق اسپاپتار وركەسترىنىڭ ۇلكەن توبى، ب.لەبەدەۆ قۇرعان ىشەكتى اسپاپتار كۆارتەتى مەن جەتىسۋ قازاق-ورىستارىنىڭ ءان-بي ءانسامبلى كىردى.
1939 جىلى فيلارمونيا جانىنان م. م. يۆانوۆ-سوكولوۆسكي جانە ل. م. شارگورودسكيدىڭ جەتەكشىلىگىمەن سيمفونيالىق وركەستر قۇرىلدى. 1944 جىلى قازاق ۇلت-اسپاپتار وركەسترىنە قۇرمانعازى ەسىمى بەرىلدى. قازاق فيلارمونياسى وتاندىق جانە الەمدىك كلاسسيكانىڭ ۇزدىك شىعارمالارىن، قازاق كومپوزيتورلارىنىڭ تۋىندىلارىن، حالىق مۋزىكالىق فولكلورىن، كەڭەستىك كومپوزيتورلار شىعارمالارىن كاسىبي جوعارى-دەڭگەيدە ناسيحاتتاپ كەلەدى. فيلارمونيا كوكتەمگى مۋزىكالىق «جىگەر» فەستيۆالىن، «بالالاردىڭ مۋزىكا اپتالىعىن»، اڭگىمە-كونتسەرتتەردىڭ ابونەمەنتتىك توپتاماسىن، ۇلتتىق جانە سيمفونيالىق مۋزكالىق كونتسەرتتەرىن وتكىزدى. 70 — 80-جىلدارى ج.اۋباكىروۆا، ا.مۇساقوجاەۆا، گ. مىرزابەكوۆا، گ. مولداكارىموۆا سياقتى حالىقارالىق بايقاۋلاردىڭ لاۋرەاتتارى ساحناعا شىقتى. قازاق فيلارمونياسىنىڭ قۇرامىندا حور كاپەللاسى (جەتەك. قر ەڭبەك سىڭىرگەن قايراتكەر ب.دەمەۋوۆ), «وتىرار سازى» فولكلورلىق-ەتنوگرافيالىق اكادەميالىق وركەستر (جەتەكشى قر ەڭبەك سىڭىرگەن ارتيست ك.احمەتوۆ), رەسپۋبليكالىق كامەرالىق «سوليستەر اكادەمياسى» وركەسترى (جەتەكشى قر ەڭبەك سىڭگىرگەن ارتيست ا.مۇساقوجاەۆا), مەملەكەتتىك ىشەكتى كۆارتەت، مەملەكەتتىك اكادەميالىق سيمفونيالىق وركەستر (جەتەكشى قر حالىق ارتيست ت.ابدىراشەۆ) جانە انشىلەر توبى كىرگەن.
بۇگىنگى كۇنى فيلارمونيانىڭ باس ديرەكتورى- ابدۋاليەۆ اقان جىلقىشىبايۇلى.
