اقش پرەزيدەنتى دجو بايدەن ءوز قىزمەتىن اياقتاۋعا جاقىن قالعاندا، اق ۇيدەگى جۇمىسىنىڭ نەگىزگى سىرتقى ساياسي ناتيجەلەرىنىڭ ءبىرى رەتىندە ۋكرايناعا رەسەيگە قارسى كۇرەستە تابىستى قولداۋ كورسەتكەنىن اتاپ ءوتتى. بۇل تۋرالى ۆۆس جاريالادى، دەپ حابارلايدى “ادىرنا” ۇلتتىق پورتالى.
«پۋتين ۋكرايناعا باسىپ كىرگەندە، ول كيەۆتى بىرنەشە كۇننىڭ ىشىندە باسىپ الامىن دەپ ويلاعان. بىراق شىن مانىندە سوعىس باستالعاندا مەن كيەۆتىڭ ورتالىعىندا بولدىم، ال پۋتين بولمادى. پۋتين ەشقاشان ول جەردە بولعان ەمەس. وسىنى ويلاپ كورىڭىزدەرشى!» — دەدى بايدەن اقش مەملەكەتتىك دەپارتامەنتىندە وتكەن سوزىندە.
سونىمەن قاتار، ول اسكەري قيمىلدار ءجۇرىپ جاتقان، امەريكالىق كۇشتەر باقىلامايتىن ايماققا بارعان جالعىز جوعارعى باس قولباسشى ەكەنىن ايتا كەتتى.
«ءبىز ۋكرايناعا ءپۋتيندى توقتاتۋعا كومەكتەستىك. قازىر، ءۇش جىل وتكەن سوڭ، پۋتين ءوزىنىڭ ستراتەگيالىق ماقساتتارىنىڭ بىرىنە دە جەتكەن جوق. ول ۋكراينانى باعىندىرا المادى. ناتو بىرلىگىن بۇزا المادى. ۇلكەن تەرريتوريالىق جەڭىستەرگە قول جەتكىزە المادى»، — دەدى بايدەن.
بايدەن جۇمىس ءالى دە اياقتالماعانىن جانە ونى تاستاپ كەتپەۋ كەرەگىن ايتتى.
ايتا كەتسەك، 20 قاڭتاردا اقش-تىڭ جاڭا پرەزيدەنتى بولىپ رەسپۋبليكاشىل دونالد ترامپ سايلانۋى ءتيىس. ول بەيبىتشىلىكتى تەز ارادا ورناتۋدى جاقتاپ، رەسەي پرەزيدەنتى ۆلاديمير پۋتينمەن كەلىسسوزدەر جۇرگىزۋگە دايىن ەكەنىن مالىمدەگەن.
كيل الەمدىك ەكونوميكا ينستيتۋتىنىڭ مالىمەتى بويىنشا، رەسەيدىڭ ۋكرايناعا جاساعان تولىققاندى باسىپ كىرۋىنەن 2024 جىلدىڭ قازان ايىنىڭ سوڭىنا دەيىن اقش-تىڭ كيەۆكە كورسەتكەن كومەگى 88 ميلليارد دوللاردان استام بولعان (ەۋروپا تاراپىنان ۋكرايناعا 125 ميلليارد ەۋروعا جۋىق كومەك كورسەتىلگەن نەمەسە ۇسىنىلۋى ءتيىس).
كوپتەگەن رەسپۋبليكاشىلدار بايدەننىڭ ۋكرايناعا وراسان كوپ كولەمدە امەريكاندىق كومەك جىبەرۋ شەشىمىن سىنعا الىپ، ونى جاۋاپسىز ارەكەت دەپ سانايدى. ولاردىڭ پىكىرىنشە، بۇل جاعدايدى ودان ءارى ۋشىقتىرۋى مۇمكىن، بۇل ءۇشىنشى دۇنيەجۇزىلىك سوعىسقا اكەلىپ سوعۋى ىقتيمال.
ال كەيبىر ۋكراين جانە باتىس ساراپشىلارى بايدەننىڭ تىم ساقتىق تانىتقانىن، رەسەيمەن تىكەلەي قاقتىعىسقا ءتۇسۋ قورقىنىشىنان ۋكرايناعا قاجەتتى اسكەري كومەكتى ۋاقىتىلى جىبەرمەگەنىن ايتادى.
بۇل ءتاسىلدى قولداۋشىلاردىڭ پىكىرىنشە، ءاربىر جاڭا قارۋ-جاراق ءتۇرىن، مىسالى، HIMARS رەاكتيۆتى جۇيەلەرىن، تانكتەر مەن F-16 جويعىشتارىن ۋكرايناعا بەرۋ تۋرالى شەشىمدەر اق ۇيدە ۇزاق ۋاقىت تالقىلانعان.
