فوتو: Reuters
بىرىككەن اراب امىرلىكتەرىنىڭ استاناسى ءابۋ-دابيدە ۋكراينا، رەسەي جانە اقش وكىلدەرىنىڭ سوعىستى توقتاتۋعا باعىتتالعان ۇشجاقتى كەلىسسوزىنىڭ العاشقى كۇنى اياقتالدى، دەپ حابارلايدى "ادىرنا".
كەزدەسۋ 11 قاراشادا جالعاسادى.
10 قاراشادا وتكەن كەلىسسوزدەر شامامەن 4,5 ساعاتقا سوزىلىپ، 40 مينۋتتىق ءۇزىلىس جاسالعان. تاراپتار ازىرگە تالقىلاۋ بارىسى مەن ناقتى ناتيجەلەرى تۋرالى رەسمي مالىمدەمە جاساعان جوق.
الايدا «ۋكراينسكايا پراۆدا» باسىلىمىنا ۋكراين دەلەگاتسياسىنا جاقىن دەرەككوزدىڭ حابارلاۋىنشا، العاشقى كۇننىڭ قورىتىندىسىندا تاراپتار جاقىن ارادا تۇتقىنداردى اۋقىمدى كولەمدە الماستىرۋ تۋرالى ۋاعدالاسقان.
Reuters اگەنتتىگىنىڭ رەسەي دەلەگاتسياسىنداعى دەرەككوزى ماسكەۋ كەلىسسوزدەردە سوعىستان كەيىنگى ەۋروپانىڭ قاۋىپسىزدىك جۇيەسىنە قاتىستى كەلىسىمدەردى نەگىزگى تاقىرىپ رەتىندە كوتەرۋدى جوسپارلاپ وتىرعانىن ايتقان.
اقش مەملەكەتتىك حاتشىسى ماركو رۋبيو ءابۋ-دابيدەگى كەزدەسۋدى «وتە ناتيجەلى» دەپ باعالادى. ول ۋكرايناداعى سوعىستى توقتاتۋعا باعىتتالعان الداعى تالقىلاۋلارعا ەۋروپا ەلدەرىنىڭ وكىلدەرىن دە قاتىستىرۋ قاجەت ەكەنىن اتاپ ءوتتى.
«ۇزاق مەرزىمدى پەرسپەكتيۆادا ۇشجاقتى فورماتقا ەۋروپالىق سەرىكتەستەرىمىز دە قوسىلۋى كەرەك دەپ سانايمىز. ويتكەنى ولار بۇل ماسەلەنى شەشۋدىڭ ءبىر بولىگى»، – دەدى ماركو رۋبيو.
كەزدەسۋ وتەتىن جەردە ەۋروپا مەملەكەتتەرىنىڭ، ناتو مەن ەۋروپالىق وداقتىڭ وكىلدەرى دە بولعان. الايدا ولار كەلىسسوزدەر ۇستەلىنە قاتىسپاعان.
رەسەي دەلەگاتسياسىن پرەزيدەنت كومەكشىسى ۆلاديمير مەدينسكي باستاپ كەلدى. ونىڭ قۇرامىندا سىرتقى ىستەر ءمينيسترىنىڭ ورىنباسارلارى سەرگەي ريابكوۆ پەن ميحايل گالۋزين، سونداي-اق رەسەي قارۋلى كۇشتەرى باس شتابىنىڭ وكىلدەرى بار.
ال ۋكراينا دەلەگاتسياسىنا ۇلتتىق قاۋىپسىزدىك جانە قورعانىس كەڭەسىنىڭ حاتشىسى رۇستەم ومەروۆ جەتەكشىلىك ەتتى. دەلەگاتسيا قۇرامىندا ۋكراينا پرەزيدەنتى كەڭسەسىنىڭ باسشىسى كيريلل بۋدانوۆ، ونىڭ ءبىرىنشى ورىنباسارى سەرگەي كيسليتسا، قورعانىس مينيسترلىگى باس بارلاۋ باسقارماسى باسشىسىنىڭ ورىنباسارى ۆاديم سكيبيتسكي جانە جوعارعى راداداعى «حالىق قىزمەتشىسى» فراكتسياسىنىڭ جەتەكشىسى داۆيد اراحاميا بار.
ايتا كەتەيىك، بۇل – ۋكراينا مەن رەسەي اراسىنداعى سەگىز ايدان كەيىنگى العاشقى كەلىسسوز. بۇعان دەيىنگى كەزدەسۋ اقپان ايىندا جەنەۆادا وتكەن. الايدا اقش پەن ءيزرايلدىڭ يرانعا قارسى سوعىسى باستالۋىنا بايلانىستى كەلىسسوزدەر توقتاتىلعان.
