فوتو: GETTY IMAGES
اقش ادىلەت مينيسترلىگى دجەففري ەپشتەين ىسىنە قاتىستى جاڭا قۇجاتتاردى جاريالادى. Tengrinews.kz ماتەريالداردى زەرتتەپ، وندا قازاقستاننىڭ 400-دەن استام رەت اتالعانىن انىقتادى. قۇجاتتاردا الماتى مەن استاناعا ساپارلار، جوعارى لاۋازىمدى تۇلعالارمەن كەزدەسۋلەر، سونداي-اق «ي.» ەسىمدى بەلگىسىز ايەلگە قاتىستى مالىمەتتەر قامتىلعان، دەپ حابارلايدى "ادىرنا".
31 قاڭتاردا اقش ادىلەت مينيسترلىگى سەكسۋالدىق قىلمىستار ءۇشىن سوتتالعان ءارى تۇرمەدە قازا تاپقان دجەففري ەپشتەين ءىسى بويىنشا 3 ميلليون بەت قۇجات، 180 مىڭ فوتو جانە 2 مىڭ ۆيدەو جاريالادى. بۇل - ەپشتەين فايلدارىنىڭ اشىقتىعى تۋرالى زاڭ قابىلدانعاننان بەرگى ەڭ اۋقىمدى جاريالانىم. قۇجاتتاردا ونىڭ تۇرمەدە بولعان كەزەڭى، ولىمىنە قاتىستى تەرگەۋ ماتەريالدارى، سونداي-اق سىبايلاسى گيسلەين ماكسۆەلل ىسىنە قاتىستى دەرەكتەر بار.
ماتەريالداردا ەپشتەين مەن ونىڭ اينالاسىنداعىلاردىڭ قازاقستانعا ساپارلارى الدىن الا جوسپارلانىپ، ەگجەي-تەگجەيلى تالقىلانعانى كورسەتىلەدى. حات الماسۋلاردا ۆيزالار، ۇشۋ كەستەلەرى، جەكە ۇشاقپەن الماتى مەن استاناعا باعىتتار ناقتى اتالادى. كەي جازبالاردا ماسكەۋ، ريگا، ۆيلنيۋس جانە مينسك ارقىلى ترانزيتتىك مارشرۋتتار دا كورسەتىلگەن. 2014 جىلعى حاتتاردىڭ بىرىندە «جاڭا عانا الماتىعا قوندىم» دەگەن جازبا كەزدەسەدى.
2019 جىلعى مامىرداعى حات الماسۋلاردا دا قازاقستانعا ساپار تۋرالى ايتىلىپ، اۆتورلاردىڭ ءبىرى مەملەكەتتىك قاۋىپسىزدىككە جاۋاپتى «گەنەرالمەن» كەزدەسكەنىن جازعان. الايدا قۇجاتتاردا كوپتەگەن ەسىم سىزىلىپ تاستالعاندىقتان، ناقتى كىم تۋرالى ءسوز بولىپ وتىرعانى بەلگىسىز.
ء"يا، راحمەت، WH-دان كەيىن مەملەكەتتىك قاۋىپسىزدىككە جاۋاپتى گەنەرالمەن كوپ ۋاقىت وتكىزدىم – وتە جاقسى ادام",- دەپ جازادى.
جاريالانعان ماتەريالداردا قازاقستاننىڭ بۇرىنعى پرەمەر-ءمينيسترى كارىم ءماسىموۆ سەگىز رەت، ال ونىڭ ورىنباسارى «ك.» 90-نان استام رەت اتالادى. كەي حاتتاردا ەپشتەينگە ونىڭ اتى-ءجونى تانىس ەكەنى سۇرالسا، كەيىنگى جازبالاردا وعان «سالەم جەتكىزىلگەنى» تۋرالى حابارلامالار بار.
2011 جىلعى 4 تامىزداعى حاتتا بەلگىسىز ادام ەپشتەيننەن: «دجەففري، مەنىڭ قاسىمداعى ۇيدە قازاقستاننىڭ پرەمەر-ءمينيسترى كارىم ءماسىموۆ تۇرادى. سەن ونى تانيسىڭ با؟» - دەپ سۇرايدى.
ال 2014 جىلعى حات الماسۋدا ەپشتەيننىڭ اينالاسىنداعىلار كەمىندە ءۇش رەت ماسىموۆكە سالەم جەتكىزگەندەرىن حابارلاعان.
سونىمەن قاتار قۇجاتتاردا International Peace Institute (IPI) ۇيىمىندا جۇمىس ىستەگەن ي. ا. ەسىمدى ايەل بىرنەشە رەت اتالادى. حاتتاردا ول «the Kazakh girl from the IPI» — «IPI-دەگى قازاق قىزى» دەپ سيپاتتالادى.
ماتەريالدارعا قاراعاندا، ي. ەپشتەين كەزدەسۋلەرىن ۇيىمداستىرۋعا قاتىسقان جانە ونىڭ قىزمەتكەرلەرىنەن كومەك سۇراعان. ءبىر حاتتا ول ەكى تۇنگە ارزان قوناقۇي ۇسىنۋدى وتىنەدى.
2015 جىلعى 9 شىلدەدەگى جازبادا ەپشتەيننىڭ بۇرىنعى كەڭسە اسسيستەنتى ل. گ. ي-مەن كەزدەسۋدىڭ ۋاقىتىن اۋىستىرعانىن حابارلايدى. قۇجاتتاردا «IPI-دەگى قازاق قىزى ي.» ەسىمى كەمىندە 38 رەت كەزدەسەدى.
قۇجاتتاردا قازاقستانداعى ءبىر ۆەدومستۆونىڭ ەپشتەينمەن بايلانىستى بولۋى مۇمكىن قۇرىلىمدارمەن كەلىسىمشارتى اتالادى. 2014 جىلعى قاڭتاردا بۇل ۆەدومستۆو IPI-مەن جىلىنا 400 مىڭ دوللار كولەمىندە كەلىسىم جاساپ، ۆاليۋتالىق ساياسات پەن رەزەرۆتەردى باسقارۋ ماسەلەلەرى بويىنشا ءتورت كەزدەسۋ وتكىزۋدى كوزدەگەن.
سونداي-اق، 2015 جىلعى مامىردا ەپشتەينگە قازاقستان تۋرالى اناليتيكالىق جازبا جىبەرىلگەن. وعان ول: «ولارعا جىلىنا 3–5 ميلليون دە» دەپ جاۋاپ بەرگەن. بۇل قارجىنىڭ كىمگە جانە قانداي ماقساتتا قاجەت بولعانى ناقتىلانباعان.
جاريالانعان ماتەريالدار قازاقستانعا قاتىستى كوپتەگەن سۇراق تۋعىزعانىمەن، قۇجاتتاردا ناقتى قورىتىندى نەمەسە رەسمي ايىپتاۋلار كەلتىرىلمەگەن. اقش تاراپى بۇل دەرەكتەردىڭ بارلىعى اشىقتىقتى قامتاماسىز ەتۋ ماقساتىندا جاريالانعانىن اتاپ وتەدى.
