ابۋ-دابيدە رەسەي، ۋكراينا جانە اقش وكىلدەرىنىڭ قاتىسۋىمەن ۇشجاقتى كەلىسسوزدەر ءوتتى. كەلىسسوزدەردىڭ نەگىزگى تاقىرىبى اۋماقتىق ماسەلەلەر بولعانى ايتىلدى، الايدا مازمۇنى جونىندە تولىق اقپارات جاريالانعان جوق. بۇل تۋپالى ۆۆس جازدى، دەپ حابارلايدى "ادىرنا".
كەلىسسوزدەر 23 قاڭتار، جۇما كۇنى تۇستەن كەيىن باستالىپ، 24 قاڭتار، سەنبى كۇنى اياقتالدى. ۋكراينا اتىنان ۇلتتىق قاۋىپسىزدىك جانە قورعانىس كەڭەسىنىڭ حاتشىسى رۋستەم ۋمەروۆ باستاعان دەلەگاتسيا قاتىستى. اقش دەلەگاتسياسى قۇرامىندا پرەزيدەنتتىڭ ارنايى وكىلى ستيۆ ۋيتكوفف، دجارەد كۋشنەر جانە ۋكراينا بويىنشا ارنايى وكىل، اقش ارمياسىنىڭ ءمينيسترى دەن دريسكولل بولدى.
رەسەي دەلەگاتسياسىن باس شتابتىڭ باس باسقارماسى (گرۋ) باسشىسى يگور كوستيۋكوۆ باسقاردى. دەلەگاتسيا قۇرامىنا قورعانىس مينيسترلىگىنىڭ وكىلدەرى كىردى.
دەلەگاتسيا مۇشەلەرىنىڭ ەسىمدەرى رەسمي تۇردە جاريالانبادى. الايدا «اگەنتستۆو» باسىلىمى فوتوسۋرەتتەرگە سۇيەنە وتىرىپ، قاتىسۋشىلاردىڭ قاتارىندا گرۋ اقپارات باسقارماسى باسشىسىنىڭ ءبىرىنشى ورىنباسارى الەكساندر زورين مەن اۋدارماشى يليا كۋرەپوۆ بولعانىن حابارلادى.
ۋكراينا پرەزيدەنتى كەڭسەسىنىڭ مالىمەتىنشە، كەلىسسوزدەر بىرنەشە فورماتتا، سونىڭ ىشىندە جەكەلەگەن توپتاردىڭ كەزدەسۋلەرى تۇرىندە ءوتتى. رەسەيدىڭ تاسس اگەنتتىگى دە كەزدەسۋلەردىڭ ءارتۇرلى فورماتتا ۇيىمداستىرىلعانىن راستادى.
Reuters اگەنتتىگىنىڭ حابارلاۋىنشا، ءباا ۇكىمەتىنىڭ وكىلى كەلىسسوزدەر بارىسىندا رەسەي مەن ۋكراينا دەلەگاتسيالارى وكىلدەرىنىڭ تىكەلەي بايلانىسقا شىققانىن مالىمدەگەن.
ۋكراينا پرەزيدەنتى ۆلاديمير زەلەنسكي كەلىسسوزدەردى ء«پوزيتيۆتى جانە كونسترۋكتيۆتى» دەپ باعالاپ، ولاردىڭ العاشقى كۇنىندە دەلەگاتسياسىنىڭ بايانداماسىن تىڭداعان سوڭ: «بۇل — سوڭعى جىلدارىعى العاشقى ەكى كۇندىك ۇشجاقتى كەزدەسۋلەر فورماتى. كوپتەگەن ماسەلەلەر تالقىلاندى، جانە ەڭ باستىسى، سويلەسۋلەر كونسترۋكتيۆتى بولدى»، – دەدى.
ءبىرىنشى كۇننىڭ قورىتىندىسى بويىنشا ۋكراينا دەلەگاتسياسىنىڭ باسشىسى رۋستەم ۋمەروۆ كەزدەسۋدىڭ «رەسەي سوعىسىن اياقتاۋ پارامەترلەرىنە جانە كەلىسسوزدەر پروتسەسىنىڭ لوگيكاسىنا ارنالعانىن، ماقسات – لايىقتى ءارى تۇراقتى بەيبىتشىلىككە جەتۋ» دەپ حابارلادى.
زەلەنسكي الدىن الا كەزدەسۋدىڭ نەگىزگى تاقىرىبى دونباسس بولۋى كەرەك ەكەنىن ايتقان. كەلىسسوزدەن كەيىن ول تالقىلاۋدىڭ «سوعىستى اياقتاۋ مۇمكىندىكتەرىنە» باعىتتالعانىن جەتكىزدى.
«امەريكالىق باقىلاۋ مەن قاۋىپسىزدىكتى قامتاماسىز ەتۋدىڭ ماڭىزدىلىعىن باعالايمىن»، – دەپ جازدى ول Telegram-دا.
كەزدەسۋ قورىتىندىسى بويىنشا تاراپتار «كەلىسكەن ماسەلەلەردى ءوز استانالارىندا حابارلاپ، كەيىنگى قادامداردى كوشباسشىلارمەن كەلىسەدى». ۋكراينا جاڭا كەزدەسۋلەرگە، سونىڭ ىشىندە كەلەسى اپتاداعى كەزدەسۋلەرگە دايىن ەكەنىن مالىمدەدى.
ترامپتىڭ ارنايى وكىلى ستيۆ ۋيتكوفف ابۋ-دابيدەگى ۇشجاقتى كەزدەسۋلەردى كەلەسى اپتادا جالعاستىرۋ جوسپارلانعانىن ايتتى.
«جۇما جانە سەنبىدە اقش، ۋكراينا جانە رەسەي ۇشجاقتى كەزدەسۋدى وتكىزدى، بۇل مۇمكىندىككە ءباا ۇكىمەتى ىقپال ەتتى. كەلىسسوزدەر وتە كونسترۋكتيۆتى ءوتتى، ءارى ديالوگتى كەلەسى اپتادا جالعاستىرۋعا ۋاعدالاستىق. پرەزيدەنت ترامپ پەن ونىڭ كومانداسى وسى سوعىستى توقتاتىپ، بەيبىتشىلىك ورناتۋعا شەشىم قابىلداعان»، – دەدى ۋيتكوفف.
Axios اگەنتتىگىنىڭ حابارلاۋىنشا، كەلەسى كەزدەسۋ 1 اقپاندا ابۋ-دابيدە وتەدى دەپ جوسپارلانعان.
جۋرناليست باراك راۆيد ۋكراينالىق شەنەۋنىككە سىلتەمە جاساپ كەلىسسوزدەردى ء«پوزيتيۆتى» جانە «كونسترۋكتيۆتى» دەپ باعالاعانىن جازدى. AFP اگەنتتىگى ءباا ۇكىمەتىنىڭ وكىلى دە اتموسفەرانى ء«پوزيتيۆتى جانە كونسترۋكتيۆتى» دەپ اتاعانىن حابارلادى. تاسس دەرەككوزى كەلىسسوزدەردىڭ «ناتيجەسى بار» ەكەنىن جانە ابۋ-دابيدە جاقىن كۇندەرى ۇشجاقتى فورماتتا جالعاسۋى مۇمكىن ەكەنىن ايتتى. Reuters اگەنتتىگى امەريكاندىق رەسمي تۇلعاعا سىلتەمە جاساپ، جاڭا راۋند كەلەسى جەكسەنبىدە وتەتىنىن حابارلادى.
Axios اگەنتتىگى حابارلاعانداي، امەريكالىق دەلەگاتسيا مۇشەلەرى – كۋشنەر، ۋيتكوفف جانە باسقا وكىلدەر رەسەي-ۋكراينا جۇمىس توبىنىڭ كەزدەسۋلەرى وتەتىن بولمەلەر اراسىندا ءجۇرىپ، بارلىق ماسەلەلەردى تالقىلاعان.
امەريكا شەنەۋنىكتەرىنىڭ ايتۋىنشا، ەكى كۇندىك كەلىسسوز بارىسىندا رەسەيدىڭ دونباسستاعى اۋماقتىق تالاپتارى، زاپوروجە اتوم ستانتسياسى ماسەلەسى جانە ەكى تاراپ ءۇشىن دە داعدارىستى ازايتۋ شارالارى قاراستىرىلعان. ماقسات – سوعىستىڭ اياقتالعانىن كورسەتۋ جانە ونىڭ قايتا باستالماۋىن قامتاماسىز ەتۋ.
ەكىنشى كۇننىڭ سوڭىندا ءۇش دەلەگاتسيا بىرگە تۇسكى اسقا وتىردى.
«بەلگىلى ءبىر ساتتە ءبارى دەرلىك دوستار سياقتى كورىندى. ءۇمىت پايدا بولدى»، – دەدى امەريكالىق شەنەۋنىك.
ال رەسەي تاراپى اۋماقتىق ماسەلەلەر بويىنشا ۆاشينگتوننىڭ ۇستانىمىمەن كەلىسۋگە ءماجبۇر بولدى.
بۇل تۋرالى The Times باسىلىمى رەسەيلىك ديپلوماتقا سىلتەمە جاساپ جازدى.
ء«بىز الدىمەن اۋماقتىق شەگىنىستەرگە قاتىستى قانداي دا ءبىر مىندەتتەمە الۋعا ۇمىتتەندىك. الايدا كەلىسسوزدەردىڭ سوڭىندا امەريكالىقتاردىڭ پوزيتسياسىمەن كەلىسۋگە تۋرا كەلدى»، – دەدى دەرەككوز ابۋ-دابيدەگى كەلىسسوزدەردىڭ العاشقى كۇنىنەن كەيىن.
امەريكالىق رەسمي تۇلعالار ابۋ-دابيدەگى كەزدەسۋدى كەلەسى كەلىسسوزدەر كەزەڭىنە ماڭىزدى قادام دەپ باعالادى. ەگەر كەلەسى كەزدەسۋدە ۇلكەن پروگرەسس بايقالسا، تاراپتار ماسكەۋ نەمەسە كيەۆتە كەزدەسۋى مۇمكىن.
