قازاقستاننىڭ بالالار قۇقىعى جونىندەگى ۋاكىلى دينارا زاكيەۆا بلوگەر قۇپىناي قالمەنوۆا جاريالاعان اقپاراتقا قاتىستى مالىمدەمە جاسادى، دەپ حابارلايدى "ادىرنا" ۇلتتىق پورتالى.
زاكيەۆا كامەلەتكە تولماعان بالالاردىڭ قۇقىقتارىن قورعاۋ ماقساتىندا ءتيىستى شارالار قولعا الىنعانىن ايتتى.
«اتالعان جاعداي بويىنشا مەن جانە زاڭگەر كەشە بلوگەرمەن بايلانىسقا شىقتىق. قالالىق پروكۋراتۋرامەن بىرگە پروتسەستىك شەشىم قابىلداۋ ماسەلەسى بويىنشا جۇمىس ىستەپ جاتىرمىز. ۋاكىلەتتى ورگاندارمەن بىرلەسە وتىرىپ، بالالاردىڭ قۇقىقتارىن قورعاۋ ءۇشىن بارلىق قاجەتتى شارالاردى قابىلدايمىز»، – دەپ جازدى ول.
بالالار قۇقىعى جونىندەگى ۋاكىل اتا-انالاردى بالالاردىڭ قاۋىپسىزدىگىن قامتاماسىز ەتۋ كەرەكتىگىن ەسكەردى.
«اتا-انالاردى قىراعى بولۋعا شاقىرامىن: بالانىڭ كىمدەرمەن ارالاساتىنىن ءاردايىم باقىلاپ، وعان قاۋىپ-قاتەرلەر، سونىڭ ىشىندە الەۋمەتتىك جەلىلەردەگى قاۋىپتى جاعدايلار تۋرالى ايتىپ وتىرۋ قاجەت. سونداي-اق، مەكتەپتەردە قاۋىپسىزدىك ساباقتارى اياسىندا قارالاتىن تاقىرىپتاردى تالقىلاۋ ماڭىزدى»، – دەدى دينارا زاكيەۆا.
ەسكە سالا كەتەيىك، جەلىدە ورالدىق بلوگەر قولعانات جۇماباەۆ كامەلەتكە تولماعان قىزدارعا جازىپ، قىرىندادى دەگەن داۋ شىققان بولاتىن.
