استانادا الەۋمەتتىك جەلىدە ەرەكشە بالالار مەن ولاردىڭ اتا-اناسىنا قاتىستى قورلايتىن ءارى بەيادەپ سوزدەر قولدانعان بلوگەرگە اكىمشىلىك ءىس قوزعالدى، دەپ حابارلايدى "ادىرنا" ۇلتتىق پورتالى.
اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ مالىمەتىنشە، 2025 جىلعى 2 جەلتوقساندا ازاماتشا و.-عا قاتىستى ۇساق بۇزاقىلىق فاكتىسى بويىنشا اكىمشىلىك ءىس تىركەلگەن. ول قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 434-بابىنىڭ 1-بولىگى بويىنشا جاۋاپقا تارتىلىپ وتىر.
ءىس ماتەريالدارىنا سايكەس، بلوگەر Instagram پاراقشاسىندا بەينەجازبا جاريالاپ، وندا قوعامعا جانە ەرەكشە قاجەتتىلىگى بار ادامدارعا قاتىستى قورلايتىن ءارى بەيادەپ سوزدەر ايتقان. وسى ارەكەتى ارقىلى قوعامدىق ءتارتىپتى بۇزىپ، كوپشىلىككە اشىق تۇردە قۇرمەتسىزدىك تانىتقانى انىقتالعان.
سوتقا دەيىنگى تەرگەپ-تەكسەرۋ جۇرگىزىلمەگەن، سەبەبى بۇل قۇقىقبۇزۋشىلىق اكىمشىلىك ءىس جۇرگىزۋ تارتىبىمەن قارالادى. سوت وتىرىسىندا ول بەيادەپ ءسوز قولدانعانىن راستاعانىمەن، بالالاردى قورلاۋ نيەتى بولماعانىن ايتىپ، كىناسىن ءىشىنارا مويىندادى.
قر اقبتك 434-بابى 1-بولىگىنىڭ سانكتسياسىنا سايكەس، قۇقىقبۇزۋشىعا 20 ايلىق ەسەپتىك كورسەتكىش مولشەرىندە ايىپپۇل سالۋ نەمەسە 20-دان 60 ساعاتقا دەيىن قوعامدىق جۇمىستارعا تارتۋ، نە بولماسا 5 تاۋلىكتەن 15 تاۋلىككە دەيىن اكىمشىلىك قاماۋعا الۋ جازاسى قاراستىرىلعان.
سونىمەن قاتار قر اقبتك-ءنىڭ 50-بابىنىڭ 2-بولىگىنە سايكەس، 14 جاسقا دەيىنگى بالالارى بار ايەلدەرگە اكىمشىلىك قاماۋ قولدانىلمايدى.
