قاراعاندى وبلىسىندا «تازا قازاقستان» ەكولوگيالىق باعدارلاماسىن جۇزەگە اسىرۋ جالعاسۋدا. قىسقى ۋاقىتتا ورمانشىلار مەن اڭشىلىق شارۋاشىلىعىنىڭ ماماندارى جابايى جانۋارلاردى عانا ەمەس، قۇستاردى دا قورەكتەندىرۋمەن اينالىسادى. باعدارلاما اياسىندا سۋىق اۋا رايى باستالعاننان بەرى قۇستارعا ارنالعان شامامەن 200 ۇيا مەن جەمسالعىش ورناتىلدى. ولار تەك ورمان القاپتارىندا عانا ەمەس، قالالىق اۋماقتاردا دا ورناتىلۋدا.
تابيعي رەسۋرستار جانە تابيعاتتى پايدالانۋ باسقارماسىنىڭ ورمانشىلارى جەمسالعىشتار مەن ۇيالاردى قولدا بار ماتەريالداردان جاسايدى. قىس بويى قۇستارعا ارنالعان جەمسالعىشتاردا ازىقتىڭ جەتكىلىكتى بولۋىن قاداعالايدى.
بۇگىن كيرزوۆود زاۋىتى اۋدانىنىڭ اعاشتى القابىندا 10-نان استام قۇس ۇياسى ورناتىلدى.
– قىستا قۇستار ءبىزدىڭ كومەگىمىزگە وتە مۇقتاج، ويتكەنى ايازدى كۇندەرى مەن قار قالىڭ بولعاندا، ولارعا وزدىگىنەن ازىق تابۋ قيىنعا سوعادى. سوندىقتان مەن وبلىس تۇرعىندارىن بەي-جاي قالماۋعا، مۇمكىندىگىنشە جەمسالعىشتار مەن قۇس ۇيالارىن جاساپ، ولاردى قالا اۋماعىندا ورنالاستىرۋعا شاقىرامىن. الايدا، قۇستاردى ازىقتاندىرۋ كەزىندە بەلگىلى ءبىر ەرەجەلەردى ساقتاۋ قاجەت. قۇستاردى تۇزدى، قۋىرىلعان، بۇرىشتالعان تاعامدارمەن، سونداي-اق توقاشتارمەن، جاڭا پىسكەن اق نانمەن، قارا نانمەن نەمەسە باداممەن قورەكتەندىرۋگە بولمايدى، – دەيدى قاراعاندى وبلىستىق ورمان جانە جانۋارلار الەمىن قورعاۋ شارۋاشىلىعىنىڭ اڭشىسى الەكساندر موسكالەنكو.
2024 جىلدىڭ ماۋسىم ايىنان باستاپ بۇگىنگى كۇنگە دەيىن قاراعاندى وبلىسىندا ەكولوگيالىق «تازا قازاقستان» اكتسياسىنىڭ اياسىندا جەتى ءىرى جانە اۋقىمدى ءىس-شارا ۇيىمداستىرىلىپ، ءساتتى وتكىزىلدى. وعان سەمينارلار، ترەنينگتەر، اقپاراتتىق اكتسيالار، فورۋمدار جانە مادەني-باعدارلامالىق ءىس-شارالار كىردى. بۇل ءىس-شارالار ەكولوگيالىق ساۋاتتىلىقتى ارتتىرۋعا، ەكولوگيالىق مادەنيەتتى دامىتۋعا جانە ازاماتتاردى قورشاعان ورتانى جاقسارتۋ بويىنشا بەلسەندى ءىس-ارەكەتتەرگە تارتۋعا باعىتتالعان كەڭ اۋقىمدى ماسەلەلەردى قامتىدى.
