قاراعاندى وبلىسىندا «مەرەيلى وتباسى – 2026» ۇلتتىق بايقاۋىنىڭ وڭىرلىك كەزەڭى ءوز مارەسىنە جەتىپ، ۇزدىكتەرى انىقتالدى.
بيىل ءوڭىردىڭ قالالارى مەن اۋداندارىنان 100-دەن استام وتباسى بايقاۋدىڭ ىرىكتەۋ كەزەڭىنە قاتىسىپ، وزدەرىنىڭ ونەگەلى ءومىر جولىن، بەرىك وتباسىلىق داستۇرلەرىن، تولايىم جەتىستىكتەرى مەن قوعامدىق باستامالارىن كوپشىلىك نازارىنا ۇسىندى. سولاردىڭ اراسىنان وبلىستىق كەزەڭگە 26 وتباسى جولداما الدى.
بايقاۋدىڭ باس جۇلدەسى قاراعاندى قالاسىنان قاتىسقان كەرنەباەۆتار وتباسىنا بۇيىردى. ولار وتباسى مۇشەلەرىنىڭ اراسىنداعى بەرىك سىيلاستىق پەن ءوزارا قولداۋدى، ۇرپاقتار ساباقتاستىعىن، بەلسەندى ازاماتتىق ۇستانىمدى جانە ۇلتتىق ءارى وتباسىلىق قۇندىلىقتارعا دەگەن قۇرمەتتى ءومىر سالتىنا اينالدىرعان جانۇيا رەتىندە تانىلدى. ەندى كەرنەباەۆتار وتباسى رەسپۋبليكالىق كەزەڭدە قاراعاندى وبلىسىنىڭ نامىسىن قورعايدى.
ءبىرىنشى ورىندى نۇرا اۋدانىنان كەلگەن پىشەنباەۆتار وتباسى يەلەندى.
ەكىنشى ورىن وساكاروۆ اۋدانىن تانىستىرعان پياتا وتباسىنا بەرىلدى.
ال ءۇشىنشى ورىن قارقارالى اۋدانىنان قاتىسقان بەيسەناەۆتار وتباسىنا بۇيىردى.
بايقاۋ قورىتىندىسىن شىعارۋ بارىسىندا قازىلار القاسى وتباسىلىق داستۇرلەردىڭ ساقتالۋى مەن ساباقتاستىعىنا، ۇرپاق تاربيەسىنە، قوعامدىق بەلسەندىلىككە، بالالارعا كورسەتىلەتىن ءتالىم-تاربيەگە، سونداي-اق وتباسىنىڭ ۇلتتىق قۇندىلىقتاردى دارىپتەۋ مەن دامىتۋعا قوسقان ۇلەسىنە باسا نازار اۋداردى.
«مەرەيلى وتباسى» – جىل سايىن ونەگەلى وتباسىلاردىڭ باسىن قوسىپ، ولاردىڭ ءومىر جولى ارقىلى سىيلاستىق، مەيىرىم، جاۋاپكەرشىلىك پەن بىرلىكتىڭ قادىرىن دارىپتەيتىن تاعىلىمدى بايقاۋ.
ونىڭ باستى ءمانى – كەيىنگى ۇرپاققا ۇلگى بولارلىق وتباسىلىق قۇندىلىقتار مەن داستۇرلەردى كەڭىنەن ناسيحاتتاپ، جاقسى تاجىريبەنى ۇرپاقتان-ۇرپاققا جەتكىزۋگە جول اشۋ.
