بۇگىن – قازاقستاننىڭ حالىق جازۋشىسى، قر مەملەكەتتىك سىيلىعىنىڭ يەگەرى، اقىن قادىر مىرزاليەۆتىڭ دۇنيەگە كەلگەن كۇنى.
“قازاق جىرىنىڭ قادىرى” اتانعان اقىن قادىر مىرزاليەۆ 1935 جىلى 5 قاڭتاردا باتىس قازاقستان وبلىسىنىڭ جىمپيتى اۋىلىندا دۇنيەگە كەلگەن. اقىننىڭ تۋعانىنا بيىل 90 جىل تولىپ وتىر.
قادىر مىرزاليەۆتىڭ العاش رەت ولەڭ جازۋدى التىنشى سىنىپتا وقىعانىندا، 11 جاسىندا باستاعان. اكەسى قايتىس بولعاننان كەيىن بالا قادىر ينتەرناتقا جىبەرىلىپ، وندا ول دوستارى تۋرالى، ولاردىڭ كەمشىلىكتەرى تۋرالى جازا باستايدى. 1954 جىلى جاس اقىن ولەڭدەرىن رەسپۋبليكالىق «پيونەر» جۋرنالىندا جاريالاپ، بىرتىندەپ تانىلا باستاعان.
قازۇۋ-ءدىڭ فيلولوگيا فاكۋلتەتىن بىتىرگەن. 1958-1993 جىلدارى “بالدىرعان” جۋرنالىندا ادەبي قىزمەتكەر، “جۇلدىز” جۋرنالىندا پوەزيا جانە سىن ءبولىمىنىڭ مەڭگەرۋشىسى، جاۋاپتى حاتشى، باس رەداكتوردىڭ ورىنباسارى قىزمەتتەرىن اتقارعان.
سونىمەن قاتار، “جازۋشى” باسپاسىندا پوەزيا رەداكياسىنىڭ مەڭگەرۋشىسى، جازۋشىلار وداعى پوەزيا سەكتسياسىنىڭ مەڭگەرۋشىسى، “بالاۋسا” باسپاسىنىڭ رەداكتورى بولىپ جۇمىس ىستەگەن.
قازاق كسر جوعارعى كەڭەسىنە ەكى رەت دەپۋتات بولىپ سايلانعان.
1959 جىلى تۇڭعىش جيناعى "كوكتەم" جارىق كورگەن. اقىن قالامىنان حالىق فولكلورىنىڭ اتاقتى كۇلدىرگى كەيىپكەرى الدار كوسە جايلى «ساقال ساۋداسى»، «قاسقىر قاقپان» اتتى وتكىر ساتيرالى كومەديا مەن ماحامبەتتىڭ ەڭ سوڭعى ازاپتى كۇندەرىنە ارنالعان «جارالى جولبارىس» اتتى جانە «ءامىر تەمىر» كەسەك درامالىق شىعارمالارى دا جارىق كورگەن. «قىزىل كىتاپ»، «كۇمىس قوڭىراۋ»، «دالا ديدارى»، «وي ورمانى»، ت.ب. جىر جيناقتارى بار.
قادىر مىرزاليەۆ كوركەم اۋدارما سالاسىندا دا جەمىستى ەڭبەكتەرى كوپ. الەمدىك ادەبيەت عۇلامالارىنىڭ تالايىنىڭ شىعارمالارىن قازاق تىلىنە اۋدارعان.
