Búgin – Qazaqstannyń halyq jazýshysy, QR Memlekettik syılyǵynyń ıegeri, aqyn Qadyr Myrzalıevtiń dúnıege kelgen kúni.
“Qazaq jyrynyń Qadyry” atanǵan aqyn Qadyr Myrzalıev 1935 jyly 5 qańtarda Batys Qazaqstan oblysynyń Jympıty aýylynda dúnıege kelgen. Aqynnyń týǵanyna bıyl 90 jyl tolyp otyr.
Qadyr Myrzalıevtiń alǵash ret óleń jazýdy altynshy synypta oqyǵanynda, 11 jasynda bastaǵan. Ákesi qaıtys bolǵannan keıin bala Qadyr ınternatqa jiberilip, onda ol dostary týraly, olardyń kemshilikteri týraly jaza bastaıdy. 1954 jyly jas aqyn óleńderin respýblıkalyq «Pıoner» jýrnalynda jarııalap, birtindep tanyla bastaǵan.
QazUÝ-diń fılologııa fakýltetin bitirgen. 1958-1993 jyldary “Baldyrǵan” jýrnalynda ádebı qyzmetker, “Juldyz” jýrnalynda poezııa jáne syn bóliminiń meńgerýshisi, jaýapty hatshy, bas redaktordyń orynbasary qyzmetterin atqarǵan.
Sonymen qatar, “Jazýshy” baspasynda poezııa redakııasynyń meńgerýshisi, Jazýshylar odaǵy poezııa sekııasynyń meńgerýshisi, “Balaýsa” baspasynyń redaktory bolyp jumys istegen.
Qazaq KSR Joǵarǵy Keńesine eki ret depýtat bolyp saılanǵan.
1959 jyly tuńǵysh jınaǵy "Kóktem" jaryq kórgen. Aqyn qalamynan halyq folklorynyń ataqty kúldirgi keıipkeri Aldar kóse jaıly «Saqal saýdasy», «Qasqyr qaqpan» atty ótkir satıraly komedııa men Mahambettiń eń sońǵy azapty kúnderine arnalǵan «Jaraly jolbarys» atty jáne «Ámir Temir» kesek dramalyq shyǵarmalary da jaryq kórgen. «Qyzyl kitap», «Kúmis qońyraý», «Dala dıdary», «Oı ormany», t.b. jyr jınaqtary bar.
Qadyr Myrzalıev kórkem aýdarma salasynda da jemisti eńbekteri kóp. Álemdik ádebıet ǵúlamalarynyń talaıynyń shyǵarmalaryn qazaq tiline aýdarǵan.
