بۇگىن - كومپوزيتور، ديريجەر، حالىق ءارتىسى، قازاقستاننىڭ ەڭبەك سىڭىرگەن ونەر قايراتكەرى، قازاقستان مەملەكەتتىك سىيلىعىنىڭ لاۋرەاتى، حالىق قاھارمانى نۇرعيسا تىلەنديەۆتىڭ تۋعان كۇنى. ايگىلى ونەر قايراتكەرىنىڭ تۋعانىنا 99 جىل تولىپ وتىر.
ول 1925 جىلى 1 ءساۋىر كۇنى الماتى وبلىسى ىلە اۋدانىندا دۇنيەگە كەلگەن.
الماتى كونسەرۆاتورياسى (قازىرگى قۇرمانعازى اتىنداعى قازاق ۇلتتىق كونسەرۆاتوريا) مەن ماسكەۋ مەملەكەتتىك كونسەرۆاتورياسىن بىتىرگەن.
1952-1961 جىلدارى - اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديريجەرى، 1960-1964 جىلدارى - قازاقتىڭ حالىق اسپاپتار وركەسترىنىڭ باس ديريجەرى، 1968-1981 جىلدارى - «قازاقفيلم» كينوستۋدياسى مۋزىكا رەداكتسياسىنىڭ باس رەداكتورى. 1981 جىلدان «وتىرار سازى» فولكلورلىق-ەتنوگرافيالىق ءانسامبلىنىڭ ۇيىمداستىرۋشىسى ءارى كوركەمدىك جەتەكشىسى قىزمەتتەرىن اتقاردى.
«التىن تاۋلار» وپەراسىنىڭ (ق.قوجامياروۆپەن بىرگە), «دوستىق جولىمەن» بالەتىنىڭ (ل.ستەپانوۆپەن بىرگە), «ورتەكە» بالەت-پوەماسىنىڭ، «مەنىڭ قازاقستانىم» كانتاتاسىنىڭ، وركەسترگە ارنالعان «پوەما»، «اتا تولعاۋى»، «اقساق قۇلان»، «اققۋ»، «ارمان»، «ماحامبەت»، «كوش كەرۋەن» پوەمالارى مەن «حالىق قۋانىشى»، «قايرات»، «جەڭىس سالتاناتى» اتتى كىرىسپەلەردىڭ، 400-گە تارتا ءان مەن رومانستىڭ اۆتورى. 50-دەن استام درامالىق قويىلىمعا، 19 كوركەم فيلمگە، 17 مۋلتيپليكاتسيالىق فيلمگە، 14 دەرەكتى-حرونيكالىق فيلمگە مۋزىكا جازدى. 1998 جىلى كوز جۇمعان.
ەكى رەت ەڭبەك قىزىل تۋ وردەنىمەن ماراپاتتالعان. استانا، الماتى قالالارىندا نۇرعيسا تىلەنديەۆ اتىنداعى كوشە بار. الماتىدا ونەر قايراتكەرىنە ەسكەرتكىش تۇرعىزىلعان.
