الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا «مەركۋر تاۋن» تۇرعىن ءۇي كەشەنىنىڭ كۇزەتشىسىن ءولتىرۋ ءىسى كەلىپ ءتۇستى، دەپ حابارلايدى "ادىرنا" ۇلتتىق Press.kz-كە سىلتەمە جاساپ.
«اسا قاتىگەزدىكپەن ادام ءولتىرۋ» بابى بويىنشا ايىپتالۋدان بولەك، سوتتالۋشى «ادامنىڭ جەكە ومىرىنە قاتىستى اقپاراتتى ونىڭ كەلىسىمىنسىز تاراتۋ» بابىمەن دە ايىپتالۋدا.
«ءبىرىنشى ەپيزود بويىنشا سوتتالۋشى الماتىداعى تۇرعىن ءۇي كەشەندەرىنىڭ ءبىرىنىڭ كۇزەتشىسىن 2024 جىلدىڭ ناۋرىزىندا ءولتىردى دەپ ايىپتالۋدا. سونداي-اق، تەرگەۋ سوتتالۋشىنىڭ الەۋمەتتىك جەلىلەر ارقىلى ءوزىنىڭ تانىسى ا-عا قاتىستى ينتيمدىك سيپاتتاعى ۆيدەوماتەريالداردى تاراتقانىن انىقتادى»، – دەلىنگەن سوت حابارلاماسىندا.
قازىرگى ۋاقىتتا سوت وتىرىسى تاعايىندالعان جوق.
ەستەرىڭىزگە سالا كەتەيىك، «مەركۋر تاۋن» تۇرعىن ءۇي كەشەنىنىڭ تۇرعىنىنىڭ كۇزەتشىنى بىرنەشە رەت جول تالعامايتىن كولىكپەن باسىپ، كەيىن ونىڭ باسىنان سەكىرگەن قاتىگەز ارەكەتى ۆيدەوعا ءتۇسىپ قالعان ەدى. وقيعا ناۋرىزدىڭ 28-ىنەن 29-ىنا اۋعان ءتۇنى بولعان. كۇزەتشى اۋىر حالدە اۋرۋحاناعا جەتكىزىلگەنىمەن، سول جەردە كوز جۇمدى.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز