قاراپايىم حالىقتىڭ زاڭدى مۇلتىكسىز ورىنداۋىن وتە قاتال تالاپ ەتەتىن پرەزيدەنت وزىنە تىكەلەي باعىنىشتى بيىك دارەجەلى شەنەۋنىكتەرگە دە سولاي قاتال ما ەكەن، كىم بىلەدى...
جەلتوقسان ايىندا اۋديتورلار جاريالاعان مىنا اقپارات كوپتىڭ نازارىنان تىس قالدى: ماڭىزدى سالالاردى باسقارىپ وتىرعان اسا لاۋازىمدى شەنەۋنىكتەر وزدەرىنە تيەسىلى مىندەتتەرىن وزدەرى شەشۋدىڭ ورنىنا شەتەلدىك كەڭەسشىلەرگە جۇكتەپ، ولارعا مەملەكەت قازىناسىنان قىرۋار قارجى تولەيدى ەكەن.
مىسالى، پرەزيدەنتكە تىكەلەي باعىنىشتى «سامۇرىق-قازىنا» وزىنە قارايتىن كومپانيالاردىڭ 82 پايىزىن، ستراتەگيالىق نىسانداردىڭ (!) 60 پايىزىنىڭ ەسەپ-قيسابىن شەتەلدىك اۋديتورلاردىڭ قولىنا بەرىپ قويعان.
«قازاتومپروم»، Qazaq Air, KEGOC, «قازاقستان تەمىر جولى»، QazaqGaz, «قازاقتەلەكوم»، QazTrade سياقتى كومپانيالاردىڭ ءبارى وزدەرىنىڭ تىكەلەي مىندەتتەرىن شەتەلدىك ساراپشىلارعا ورىنداتادى دەيدى تەكسەرۋشىلەر.
مىسالى، «جولاۋشىلار تاسىمالى» اق ءوزى ميللياردتاعان قارىزعا باتىپ وتىرسا دا، بيزنەس-جوسپارىن نەمىستەرگە 8 ميلليارد تەڭگەگە جاساتقان. قۇزىرەتسىزدىك دەگەن وسى.
قتج-عا دا زاڭ قىزمەتتەرىن شەتەلدىكتەر كورسەتەدى.
الماتى اكىمدىگى ىشكى ءتۋريزمنىڭ تالداۋ جۇمىستارىن شەتەلدىكتەرگە تاپسىرىس بەرىپ جاساتقان.
«سامۇرىق-قازىناعا» قارايتىن كومپانيالاردىڭ شەتەلدىكتەرگە قانشاما ميلليوندارعا تاپسىرىس بەرگەنى شيشكيننىڭ تەلەگرام-ارناسىندا جازۋلى تۇر.
ياعني، مەملەكەت ەكى ەسە زيان شەگىپ جاتىر – ۇلتتىق كومپانيالارداعى وزدەرىن تەڭدەسسىز سانايتىن توپ-مەنەدجەرلەر ميلليونداعان جالاقى الادى، ال ولاردىڭ جۇمىسىن شەتەلدىك كونسۋلتانتتار ميللياردتاعان قارجىعا جاساپ بەرەدى. سوندا شتاتتاعى قىزمەتكەرلەر نە ءۇشىن وتىر؟
ۇلتتىق بانكتەن باستاپ 17 بانك اۋديتور قىزمەتىن شەتەلدىك اتاقتى كومپانيالارعا تاپسىرىپ قويىپتى. ءتىپتى ۇلتتىق قوردىڭ دا ءاۋديتىن قۇرىلعالى بەرى «ۇلكەن تورتتىك» جاسايدى ەكەن.
بۇلاردىڭ ءبارى - ستراتەگيالىق نىساندار. بۇكىل قۇندى مالىمەت كىمدەردىڭ قولىندا سوندا...
قازاقستاندىق شەنەۋنىكتەردىڭ ارقاسىندا كەرەمەت «مايشەلپەككە» يە بولعان شەتەلدىك اۋديتورلىق كومپانيالاردىڭ ەلىمىزدە 3 مىڭ قىزمەتكەرى بار ەكەن (!).
شەتەلدىك كەڭەسشىلەر زاڭ شىعارۋ قىزمەتىنە دە ارالاسىپ جاتىر دەيدى تەكسەرۋشىلەر. مىسالى، «تسيفرلى قازاقستان»، جاسىل ەكونوميكا جوبالارىن، ت.ب. سول شەتەلدىك ماماندار جاساپ بەرگەن. ءبىزدىڭ مينيسترلەر وزدەرى قۇددى دايىنداعانداي كوپىرىپ ماقتانۋعا شەبەر.
شەتەلدىك كومپانيا وكىلدەرى قارجىعا قاتىستى ماڭىزدى سالالاردا لوببي دە جاسايدى ەكەن. بۇل تاۋەلسىزدىككە قاۋىپ ەمەس دەپ كىم ايتادى…
«شاڭىراققا قاراتقىش» دەپۋتاتتار وسى سالاعا قاتىستى زاڭداردى قايتا قاراپ، شەنەۋنىكتەردىڭ مەملەكەت قارجىسىن وڭدى-سولدى جۇمساۋىنا تىيىم سالماسا، حالىقتان ايىپپۇل جيناپ قانا بيۋدجەت جىرتىعىن جاماۋ مۇمكىن ەمەس قوي.
دينا يمامباي
