Qarapaıym halyqtyń zańdy múltiksiz oryndaýyn óte qatal talap etetin prezıdent ózine tikeleı baǵynyshty bıik dárejeli sheneýnikterge de solaı qatal ma eken, kim biledi...
Jeltoqsan aıynda aýdıtorlar jarııalaǵan myna aqparat kóptiń nazarynan tys qaldy: mańyzdy salalardy basqaryp otyrǵan asa laýazymdy sheneýnikter ózderine tıesili mindetterin ózderi sheshýdiń ornyna sheteldik keńesshilerge júktep, olarǵa memleket qazynasynan qyrýar qarjy tóleıdi eken.
Mysaly, prezıdentke tikeleı baǵynyshty «Samuryq-Qazyna» ózine qaraıtyn kompanııalardyń 82 paıyzyn, strategııalyq nysandardyń (!) 60 paıyzynyń esep-qısabyn sheteldik aýdıtorlardyń qolyna berip qoıǵan.
«Qazatomprom», Qazaq Air, KEGOC, «Qazaqstan Temir Joly», QazaqGaz, «Qazaqtelekom», QazTrade sııaqty kompanııalardyń bári ózderiniń tikeleı mindetterin sheteldik sarapshylarǵa oryndatady deıdi tekserýshiler.
Mysaly, «Jolaýshylar tasymaly» AQ ózi mıllıardtaǵan qaryzǵa batyp otyrsa da, bıznes-josparyn nemisterge 8 mıllıard teńgege jasatqan. Quzyretsizdik degen osy.
QTJ-ǵa da zań qyzmetterin sheteldikter kórsetedi.
Almaty ákimdigi ishki týrızmniń taldaý jumystaryn sheteldikterge tapsyrys berip jasatqan.
«Samuryq-Qazynaǵa» qaraıtyn kompanııalardyń sheteldikterge qanshama mıllıondarǵa tapsyrys bergeni Shıshkınniń telegram-arnasynda jazýly tur.
Iaǵnı, memleket eki ese zııan shegip jatyr – ulttyq kompanııalardaǵy ózderin teńdessiz sanaıtyn top-menedjerler mıllıondaǵan jalaqy alady, al olardyń jumysyn sheteldik konsýltanttar mıllıardtaǵan qarjyǵa jasap beredi. Sonda shtattaǵy qyzmetkerler ne úshin otyr?
Ulttyq bankten bastap 17 bank aýdıtor qyzmetin sheteldik ataqty kompanııalarǵa tapsyryp qoıypty. Tipti Ulttyq qordyń da aýdıtin qurylǵaly beri «úlken tórttik» jasaıdy eken.
Bulardyń bári - strategııalyq nysandar. Búkil qundy málimet kimderdiń qolynda sonda...
Qazaqstandyq sheneýnikterdiń arqasynda keremet «maıshelpekke» ıe bolǵan sheteldik aýdıtorlyq kompanııalardyń elimizde 3 myń qyzmetkeri bar eken (!).
Sheteldik keńesshiler zań shyǵarý qyzmetine de aralasyp jatyr deıdi tekserýshiler. Mysaly, «ıfrly Qazaqstan», jasyl ekonomıka jobalaryn, t.b. sol sheteldik mamandar jasap bergen. Bizdiń mınıstrler ózderi quddy daıyndaǵandaı kópirip maqtanýǵa sheber.
Sheteldik kompanııa ókilderi qarjyǵa qatysty mańyzdy salalarda lobbı de jasaıdy eken. Bul táýelsizdikke qaýip emes dep kim aıtady…
«Shańyraqqa qaratqysh» depýtattar osy salaǵa qatysty zańdardy qaıta qarap, sheneýnikterdiń memleket qarjysyn ońdy-soldy jumsaýyna tyıym salmasa, halyqtan aıyppul jınap qana bıýdjet jyrtyǵyn jamaý múmkin emes qoı.
Dına Imambaı
