مەملەكەت باسشىسى قاسىم-جومارت توقاەۆ «انا ءتىلى» گازەتىنە بەرگەن سۇحباتىندا بىرىڭعاي ۋاقىت بەلدەۋىنە قاتىستى سۇراققا پىكىر ءبىلدىردى، دەپ حابارلايدى “ادىرنا” ۇلتتىق پورتالى.
توقاەۆ ۋاقىت بەلدەۋىنە قاتىستى جاعدايدى كورىپ-ءبىلىپ وتىرعانىن ايتتى.
”ۇكىمەت ءوز شەشىمىنىڭ ورىندى ەكەنىنە سەنىمدى جانە قازاقستان ءبىر ۋاقىت بەلدەۋىندە بولۋى قاجەت دەپ سانايدى. ۋاقىتتى دۇرىس پايدالانۋ تۋرالى بارسەلونا دەكلاراتسياسىندا ءارتۇرلى ۋاقىت بەلدەۋىن ەنگىزۋگە، ونى قىسقى جانە جازعى ۋاقىتقا اۋىستىرۋعا اۋەس بولماۋ قاجەتتىگى ايتىلعان. دەگەنمەن ازاماتتارىمىز ءوتىنىش ءبىلدىرىپ جاتىر. ۇكىمەتتىڭ شەشىمىنە قاتىستى اشىق تالقىلاۋلار جاندانا ءتۇستى. مەنىڭشە، قوعامدا كوزقاراس قايشىلىعىن تۋدىراتىن مۇنداي ماسەلەلەردى مۇقيات تالقىلاۋ قاجەت. سوندىقتان پارلامەنتتە عالىمداردىڭ، ساراپشىلاردىڭ جانە ايماق وكىلدەرىنىڭ قاتىسۋىمەن قوعامدىق تىڭداۋ ءوتتى. تاراپتار ۋاقىت بەلدەۋىن اۋىستىرۋدىڭ ەل ەكونوميكاسىنا جانە ازاماتتاردىڭ تۇرمىسىنا اسەرى جونىندەگى بارلىق پىكىردى ەسكەرە وتىرىپ، 1 ناۋرىزعا دەيىن جان-جاقتى زەرتتەۋ جۇرگىزۋگە ۋاعدالاستى. سودان كەيىن ناقتى ۇسىنىستار ازىرلەنەدى. پارلامەنت پەن ۇكىمەت بۇل ماسەلەنى بايىپپەن زەردەلەپ، ورتاق ءارى دۇرىس شەشىمگە كەلەتىنىنە سەنىمدىمىن”، – دەيدى توقاەۆ.
ايتا كەتەيىك، بۇعان دەيىن بىرىڭعاي ۋاقىتقا كوشۋدىڭ حالىق دەنساۋلىعىنا اسەرىن زەرتتەۋ باستالعانى حابارلانعان بولاتىن. بۇل تۋرالى بيومەديتسينا، نەيروعىلىم، بيوفيزيكا، گەنەتيكا، استروفيزيكا، مەترولوگيا جانە مەديتسينا سالاسىنداعى عالىمدار مەن ساراپشىلاردىڭ قاتىسۋىمەن وتكەن «بىرىڭعاي ۋاقىت بەلدەۋى: عىلىمي اسپەكتىلەر» دوڭگەلەك ۇستەلىنىڭ جۇمىسى بارىسىندا بەلگىلى بولدى.
عىلىم جانە جوعارى ءبىلىم مينيسترلىگىنىڭ مالىمەتىنشە، زەرتتەۋ ۋاقىت رەجيمى وزگەرىستەرى قازاقستاندىقتاردىڭ فيزيكالىق جانە پسيحيكالىق دەنساۋلىعىنا، سونداي-اق الەۋمەتتىك جانە ەكونوميكالىق كورسەتكىشتەرگە اسەرىن زەرتتەۋگە باعىتتالعان.
