قاجىرلى ەڭبەكتىڭ مەملەكەتتىك دەڭگەيدە باعالانۋى بارشا كاسىپ يەسىنە ەرەكشە شابىت بەرەدى . بۇل تۋرالى مەملەكەتتىك كەڭەسشى ەرلان قارين Telegram ارناسىندا جازدى، دەپ حابارلايدى «ادىرنا» ءتىلشىسى.
ايتۋىنشا، پرەزيدەنت ۇلتتىق قۇرىلتايدا سويلەگەن سوزدەرىندە ەڭبەكقورلىق پەن كاسىبيلىك قۇندىلىقتارىن دارىپتەۋ قاجەتتىگى تۋرالى ۇنەمى ايتىپ ءجۇر.
«ەلىمىزدە جۇمىسشى ماماندىقتارىنىڭ مارتەبەسى بىرتىندەپ ارتىپ كەلەدى. مۇعالىمدەر مەن دارىگەرلەردىڭ جالاقىسى كەزەڭ-كەزەڭىمەن ءوسىپ جاتىر. ءوندىرىس وزاتتارى مەن ەڭبەك ديناستيالارىنىڭ وكىلدەرىنە تۇراقتى تۇردە مەملەكەتتىك ناگرادالار بەرىلەدى. كاسىبي مەرەكەلەر كەڭىنەن اتالىپ وتىلەتىن بولدى.
بۇگىن پرەزيدەنت قاسىم-جومارت توقاەۆ ءتيىستى زاڭعا قويدى. ەندى مەملەكەتتىك ناگرادالار جۇيەسىنە (بۇرىننان بار 6 قۇرمەتتى اتاققا) 9 جاڭا قۇرمەتتى اتاق ەنگىزىلدى. اتاپ ايتقاندا، عالىمدار مەن ونەرتاپقىشتارعا، ينجەنەرلەرگە، ساۋلەتشىلەرگە جانە قۇرىلىسشىلارعا، كەنشىلەر مەن شاحتەرلەرگە، گەولوگتارعا، ونەركاسىپ، كولىك، اۋىل جانە سۋ شارۋاشىلىعى سالاسىنىڭ قىزمەتكەرلەرىنە بەرىلەتىن قۇرمەتتى اتاقتار قوسىلدى.
قاجىرلى ەڭبەكتىڭ مەملەكەتتىك دەڭگەيدە باعالانۋى بارشا كاسىپ يەسىنە ەرەكشە شابىت بەرەدى جانە ەڭبەك ادامىنىڭ بەدەلىن ودان ءارى كوتەرۋگە سەپتىگىن تيگىزەدى. بۇل زاڭعا مەملەكەت باسشىسى «جۇمىسشى ماماندىقتار جىلى» دەپ جاريالاعان جاڭا 2025 جىلدىڭ قارساڭىندا قول قويىلۋىنىڭ سيمۆولدىق ءمانى بار»،—دەدى ول.
