مۇمكىندىگى شەكتەۋلى ازاماتتاردى جۇمىسقا ورنالاستىرىپ، ولاردى قوعامنىڭ ءبىر وكىلى رەتىندە سەزىندىرۋ ءۇشىن مەملەكەت اۋقىمدى شارالاردى جۇزەگە اسىرىپ جاتىر. وكىنىشكە قاراي ەڭبەك ونىمدىلىگى تومەن دەگەن جەلەۋمەن كوپتەگەن مەكەمە جارىمجان ازاماتتاردى جۇمىسقا الىپ، قولداۋ كورسەتۋدەن قاشادى.
ايتسە دە، جامبىل وبلىسىندا «Nur Otan» پارتياسى وبلىستىق فيليالىنىڭ ۇيىمداستىرۋىمەن «كەدەرگىسىز كەلەشەك» جوباسى اياسىندا مۇمكىندىگى شەكتەۋلى جاندارعا ارنالعان بوس جۇمىس ورىندارى جارمەڭكەسى ءوتتى. بوس جۇمىس ورىندارى جارمەڭكەسىندە 24 جۇمىس بەرۋشى مەكەمەدەن 70 ماماندىق بويىنشا 166 جۇمىس ورنى ۇسىنىلدى.
«نۇر وتان» پارتياسىنىڭ وبلىستىق فيليالى توراعاسىنىڭ ورىنباسارى شابدەن تىلەۋمۇراتتىڭ ايتۋىنشا، «كەدەرگىسىز كەلەشەك» جوباسىنىڭ ماڭىزى زور.
«كەدەرگىسىز كەلەشەك» جوباسىن ىسكە اسىرۋ ەلباسى، پارتيا توراعاسى نۇرسۇلتان نازارباەۆتىڭ تاپسىرمالارى ارقىلى جۇزەگە اسىپ جاتىر. اتالعان جوبا مۇمكىندىگى شەكتەۋلى جانداردىڭ ءومىر ءسۇرۋ ساپاسىن ارتتىرۋدا مەملەكەتتىك ۋاكىلەتتى ورگاندار مەن ۇكىمەتتىك ەمەس ۇيىمداردىڭ كۇشىن بىرىكتىرۋگە مۇمكىندىك بەرەدى. سوڭعى ءۇش جىلدا پارتيانىڭ قوعامدىق قابىلداۋىنا 187 مۇمكىندىگى شەكتەۋلى جان وتىنىشپەن كەلىپ، بۇگىنگى كۇنى 66 ادامنىڭ ماسەلەسى وڭ شەشىمىن تاپتى. تۇسكەن وتىنىشتەردىڭ باسىم بولىگى – مۇمكىندىگى شەكتەۋلى جانداردى جۇمىسقا ورنالاستىرۋ، ماتەريالدىق كومەك بەرۋ، تۇرعىن ءۇي ماسەلەسى بولىپ وتىر. وسى ماسەلەلەردى ەسكەرە كەلە پارتيانىڭ وبلىستىق جانە اۋماقتىق فيليالدارى «كەدەرگىسىز كەلەشەك» پارتيالىق جوباسىن جۇزەگە اسىرۋ ماقساتىندا جىل سايىن مۇمكىندىگى شەكتەۋلى جاندارعا ارنالعان بوس جۇمىس ورىندارىنىڭ جارمەڭكەسىن ۇيىمداستىرادى. بيىل بۇل جارمەڭكە ەكىنشى رەت وتۋدە. سوڭعى ءۇش جىلدا مۇمكىندىگى شەكتەۋلى جاندارعا ارنالعان بوس جۇمىس ورىندارى جارمەڭكەسىنىڭ قورىتىندىسى بويىنشا 400-گە جۋىق مۇگەدەك جان جۇمىسقا ورنالاسقان»، – دەدى ش.تىلەۋمۇرات.
بۇگىندە جامبىل وبلىسى بويىنشا 45 326 مۇمكىندىگى شەكتەۋلى ازامات بار بولسا، ونىڭ ىشىندە 1-ءشى توپتاعىلار — 4164, 2-ءشى توپتاعىلار — 18535, 3 توپتاعىلار — 16342 ادام. ولاردىڭ 6285-ءى 18 جاسقا تولماعاندار. اعىمداعى جىلى مۇمكىندىگى شەكتەۋلى ازاماتتاردى وڭالتۋ ماقساتىندا وبلىستىق بيۋدجەتتەن 764,1 ميلليون تەڭگە قارجى بولىنگەن.
«ادىرنا»
ۇلتتىق پورتالى
