Múmkindigi shekteýli azamattardy jumysqa ornalastyryp, olardy qoǵamnyń bir ókili retinde sezindirý úshin memleket aýqymdy sharalardy júzege asyryp jatyr. Ókinishke qaraı eńbek ónimdiligi tómen degen jeleýmen kóptegen mekeme jarymjan azamattardy jumysqa alyp, qoldaý kórsetýden qashady.
Áıtse de, Jambyl oblysynda «Nur Otan» partııasy oblystyq fılıalynyń uıymdastyrýymen «Kedergisiz keleshek» jobasy aıasynda múmkindigi shekteýli jandarǵa arnalǵan bos jumys oryndary jármeńkesi ótti. Bos jumys oryndary jármeńkesinde 24 jumys berýshi mekemeden 70 mamandyq boıynsha 166 jumys orny usynyldy.
«Nur Otan» partııasynyń oblystyq fılıaly tóraǵasynyń orynbasary Shábden Tileýmurattyń aıtýynsha, «Kedergisiz keleshek» jobasynyń mańyzy zor.
«Kedergisiz keleshek» jobasyn iske asyrý Elbasy, partııa tóraǵasy Nursultan Nazarbaevtyń tapsyrmalary arqyly júzege asyp jatyr. Atalǵan joba múmkindigi shekteýli jandardyń ómir súrý sapasyn arttyrýda memlekettik ýákiletti organdar men úkimettik emes uıymdardyń kúshin biriktirýge múmkindik beredi. Sońǵy úsh jylda partııanyń qoǵamdyq qabyldaýyna 187 múmkindigi shekteýli jan ótinishpen kelip, búgingi kúni 66 adamnyń máselesi oń sheshimin tapty. Túsken ótinishterdiń basym bóligi – múmkindigi shekteýli jandardy jumysqa ornalastyrý, materıaldyq kómek berý, turǵyn úı máselesi bolyp otyr. Osy máselelerdi eskere kele partııanyń oblystyq jáne aýmaqtyq fılıaldary «Kedergisiz keleshek» partııalyq jobasyn júzege asyrý maqsatynda jyl saıyn múmkindigi shekteýli jandarǵa arnalǵan bos jumys oryndarynyń jármeńkesin uıymdastyrady. Bıyl bul jármeńke ekinshi ret ótýde. Sońǵy úsh jylda múmkindigi shekteýli jandarǵa arnalǵan bos jumys oryndary jármeńkesiniń qorytyndysy boıynsha 400-ge jýyq múgedek jan jumysqa ornalasqan», – dedi Sh.Tileýmurat.
Búginde Jambyl oblysy boıynsha 45 326 múmkindigi shekteýli azamat bar bolsa, onyń ishinde 1-shi toptaǵylar — 4164, 2-shi toptaǵylar — 18535, 3 toptaǵylar — 16342 adam. Olardyń 6285-i 18 jasqa tolmaǵandar. Aǵymdaǵy jyly múmkindigi shekteýli azamattardy ońaltý maqsatynda oblystyq bıýdjetten 764,1 mıllıon teńge qarjy bólingen.
«ADYRNA»
ulttyq portaly
