قىتاي بريكس-ءتىڭ مۇشە مەملەكەتتەرى مەن سەرىكتەس ەلدەرىمەن بىرگە ءارتۇرلى سالالاردا پراكتيكالىق ىنتىماقتاستىقتى كەڭەيتۋگە دايىن ەكەنىن مالىمدەدى. بۇل تۋرالى قحر سىرتقى ىستەر مينيسترلىگىنىڭ رەسمي وكىلى ماو نين سەيسەنبى كۇنى ايتتى، دەپ حابارلايدى "ادىرنا" ۇلتتىق پورتالى سينحۋا اگەنتتىگىنە سىلتەمە جاساپ.
كەزەكتى بريفينگتە ماو نين رەسەيدىڭ دۇيسەنبى كۇنى 2025 جىلدىڭ 1 قاڭتارىنان باستاپ بريكس سەرىكتەس ەلدەرىنىڭ ءتىزىمىن جاريالاۋىنا بايلانىستى پىكىر ءبىلدىردى.
بريكس سەرىكتەس ەلدەرى ساناتىنىڭ قۇرىلۋى – بيىل قازان ايىندا رەسەيدىڭ قازان قالاسىندا وتكەن بريكس ءسامميتىنىڭ ماڭىزدى ناتيجەلەرىنىڭ ءبىرى.
ماو نين سامميتتەن كەيىن يندونەزيا، مالايزيا، تايلاند، بەلارۋس، بوليۆيا، كۋبا، قازاقستان، وزبەكستان جانە ۋگاندا بريكس سەرىكتەس ەلدەرى رەتىندە انىقتالعانن اتاپ ءوتتى. ونىڭ ايتۋىنشا، بۇل وتكەن جىلى بلوك قۇرامىنىڭ تاريحي كەڭەيۋىنەن كەيىنگى ماڭىزدى ىلگەرىلەۋ.
"بريكس مەحانيزمىنىڭ وكىلدىگى ودان ءارى كەڭەيىپ، ونىڭ تارتىمدىلىعى مەن ىقپالى ايقىن بولا ءتۇستى. بۇل ونى گلوبالدىق وڭتۇستىك ەلدەرىنىڭ ىنتىماقتاستىعى مەن بىرلىگىن نىعايتۋداعى ماڭىزدى پلاتفورماعا اينالدىرادى", – دەدى ول.
بريكس – بۇل دامۋشى نارىقتارى بار ەكونوميكالىق الەۋەتى زور بەس ءىرى ەلدىڭ اتاۋلارىنىڭ اعىلشىن تىلىندەگى العاشقى ارىپتەرىنەن قۇرالعان قىسقارتىلعان اتاۋ: برازيليا، رەسەي، ءۇندىستان، قىتاي جانە وڭتۇستىك افريكا.
قازاقستان رەسمي تۇردە 2025 جىلدىڭ 1 قاڭتارىنان باستاپ بريكس-كە سەرىكتەس مەملەكەت مارتەبەسىن الاتىنى تۋرالى رەسەي پرەزيدەنتىنىڭ كومەكشىسى يۋري ۋشاكوۆ مالىمدەگەنىن جازعان ەدىك.
