ستانيسلاۆ چەرچەسوۆ فۋتبولدان قازاقستان ۇلتتىق قۇراماسىنىڭ جاتتىقتىرۋشىسى قىزمەتىن ساقتاپ قالادى. بۇل تۋرالى قازاقستان فۋتبول فەدەراتسياسىنىڭ سايتىندا جازىلعان، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
«كەيبىر باق-تا فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ كەتۋى تۋرالى تاراعان اقپارات شىندىققا سايكەس كەلمەيدى»، - دەلىنگەن قازاقستان فۋتبول فەدەراتسياسىنىڭ سايتىندا.
بۇعان قوسا، چەرچەسوۆتىڭ قازاقستان فۋتبول فەدەراتسياسىمەن ءالى دە قولدانىستاعى كەلىسىمشارتى بار ەكەنى ايتىلعان.
بۇعان دەيىن الەۋمەتتىك جەلىلەردە جانە اقپاراتتىق رەسۋرستاردا چەرچەسوۆتىڭ جۇمىستان كەتەتىنى تۋرالى حابار تاراعان بولاتىن. ەگەر باس باپكەر ەرتەرەك جۇمىستان شىعارىلاتىن بولسا، وعان 1 ميلليون ەۋرو كولەمىندە ايىپپۇل تولەنەتىنى حابارلانعان.
ەسكە سالا كەتەيىك، بۇعان دەيىن چەرچەسوۆ قازاق تىلىندە سۇراق قويعان قازاقستاندىق جۋرناليستكە «قازىر فرانتسۋزشا سويلەپ تۇرسىڭ با؟» دەپ جاۋاپ بەرىپ، باسى داۋعا قالعان بولاتىن. مۇنداي پىكىرلەردى ول بۇعان دەيىن دە ايتقان. 15 قازاندا قازاقستاننىڭ تۋريزم جانە سپورت مينيسترلىگى چەرچەسوۆتىڭ قازاق تىلىندە سۇراق قويعان جۋرناليستكە ايتقان پىكىرى تۋرالى قازاقستان فۋتبول فەدەراتسياسىنان تۇسىنىكتەمە سۇراعان ەدى.
سونىمەن قاتار، چەرچەسوۆ قازاقستان ۇلتتىق فۋتبول قۇراماسىنىڭ باس باپكەرى بولىپ تاعايىندالعاننان كەيىن فۋتبول فەدەراتسياسىنىڭ اتقارۋشى كوميتەتىنەن سەگىز ادامنىڭ كەتكەنى حابارلانعان بولاتىن.
