امەريكا قۇراما شتاتتارى دۇنيەجۇزىلىك دەنساۋلىق ساقتاۋ ۇيىمىنان (ددسۇ) شىعۋى مۇمكىن جانە بۇل تۋرالى دونالد ترامپتىڭ يناۋگۋراتسياسى كەزىندە، قاڭتار ايىندا جاريالاۋى ىقتيمال، دەپ حابارلايدى "ادىرنا" ۇلتتىق پورتالى Financial Times-قا سىلتەمە جاساپ.
باسىلىمنىڭ مالىمەتىنشە، ترامپتىڭ كومانداسى اقش-تىڭ ددسۇ-دان شىعۋىن تالاپ ەتۋدە. ساراپشىلاردىڭ پىكىرىنشە، بۇل شەشىم جاھاندىق دەنساۋلىق ساقتاۋ سالاسىنا "كاتاستروفالىق اسەر" ەتەدى.
اقپارات قۇرالدارىنىڭ دەرەگىنشە، اقش-تىڭ جاڭادان سايلانعان پرەزيدەنتىنىڭ كومانداسى 2025 جىلدىڭ 20 قاڭتارىندا، دونالد ترامپتىڭ يناۋگۋراتسياسى كۇنى، ەلدىڭ ددسۇ-دان شىعاتىنى تۋرالى حابارلاۋدى جوسپارلاپ وتىر.
ەگەر بۇل ورىن السا، ددسۇ قارجىلاندىرۋدىڭ ەڭ ءىرى كوزدەرىنىڭ بىرىنەن ايىرىلادى. ساراپشىلاردىڭ پىكىرىنشە، بۇل "بيۋدجەتتەگى ولقىلىقتىڭ" ورنىن تولتىرۋعا ەشكىم قابىلەتتى ەمەس.
2020 جىلى دونالد ترامپ COVID-19 تارالۋىنا بايلانىستى ۇيىمدى قىتايدىڭ باقىلاۋىندا دەپ ايىپتاپ، ددسۇ-دان شىعۋ پروتسەسىن باستاعان ەدى. الايدا بۇل پروتسەسس اياقتالماعان بولاتىن. ال ونىڭ ءىزباسارى دجو بايدەن 2021 جىلى پرەزيدەنت قىزمەتىنە كىرىسكەن العاشقى كۇنىندە اقش پەن ددسۇ اراسىنداعى قارىم-قاتىناستاردى قايتا جاڭعىرتتى.
