جامبىل وبلىسىنىڭ تۇرعىنى ەڭبەك كىتاپشاسىنداعى تەگىنىڭ دۇرىس جازىلماۋىنا بايلانىستى زەينەتاقى تولەمىن بەرۋدەن باس تارتقاندىقتان سوتقا جۇگىندى، دەپ حابارلايدى "ادىرنا" ۇلتتىق پورتالى.
ازاماتتىق ءىس جۋالى اۋداندىق سوتىندا قارالدى.
"تالاپكەر ب. 1985-1998 جىلدارى جۋالى اۋدانىنىڭ "پ" ۇجىمدىق شارۋاشىلىعىندا ءتۇرلى ماماندىقتار بويىنشا جۇمىس ىستەگەن. قۇجاتتاردى راسىمدەۋ بارىسىندا زەينەتاقى تولەۋ ورتالىعى ەڭبەك كىتاپشاسىنداعى فاميليانىڭ دۇرىس جازىلماۋىن العا تارتىپ، تولەم جاساۋدان باس تارتقان", – دەپ مالىمدەدى سوتتىڭ ءباسپاسوز قىزمەتى.
ءىس قاراۋ بارىسىندا سوت ەر ادامنىڭ اتى-ءجونى مەن اتالعان شارۋاشىلىقتا جۇمىس ىستەگەن جىلدارى كورسەتىلگەن ارحيۆ انىقتاماسىنىڭ بار ەكەنىنە نازار اۋداردى.
تالاپ قاناعاتتاندىرىلىپ، ەڭبەك كىتاپشاسىنىڭ تالاپكەرگە تيەسىلى ەكەنى تانىلدى.
سوت شەشىمى زاڭدى كۇشىنە ەنگەن جوق.
