اتىراۋدا اتا-انالار «سارمات» مامانداندىرىلعان اسكەري مەكتەبىندە وقۋشىلارعا قاتىستى زورلىق-زومبىلىق بولعانىن ايتىپ، دابىل قاقتى، دەپ حابارلايدى "ادىرنا" ۇلتتىق پورتالى "اق جايىق" باسىلىمىنا سىلتەپ.
"اق جايىق" دەرەگىنشە، مەكتەپ تاربيەلەنۋشىلەرى مۇعالىمدەردىڭ بىرنەشە رەت ۇرىپ-سوعىپ، ەلەكتروشوكەر قولدانعاندارىن ايتادى. ءتىپتى پىشاقپەن قورقىتقان كورىنەدى.
بۇل تۋرالى الەۋمەتتىك جەلىدە زارداپ شەككەن وقۋشىلاردىڭ ءبىرىنىڭ اناسى نۇرگۇل ەسپۋسينوۆا باياندادى.
«بالامنىڭ دەنەسىندەگى جاراقاتتاردى كورىپ، مەكتەپكە جاعدايدى انىقتاۋعا باردىم. بىراق سول كەزدە مەكتەپ ديرەكتورى دا، مۇعالىمدەر دە ورنىندا بولمادى. كەيىنىرەك بالامنىڭ مەكتەپتەن شىعارىلعانىن ءبىلدىم»، – دەيدى ول.
نۇرگۇل ەسپۋسينوۆا بالاسى قازان ايىنان باستاپ مەكتەپكە بارعىسى كەلمەيتىنىن ايتىپ، ۇلى ءبىلىم ورداسىندا قالۋدان ءۇزىلدى-كەسىلدى باس تارتقانىن ايتادى.
«مەكتەپ اكىمشىلىگى ۇلىمنىڭ ناسىباي قولدانعانىن ايتىپ، ونى مەكتەپتەن شىعارعان. الايدا بۇل جاعدايدى دالەلدەيتىن ەشقانداي كۋاگەرلەر جوق. پاكەت ۇلىمنىڭ سومكەسىنەن تابىلدى دەپ ايتىلعانىمەن، ول تۋرالى مەن ەشتەڭە بىلمەيمىن. قايتا تەكسەرىس ناتيجەسىندە ۇلىمنىڭ دەنەسىندە ەشقانداي زياندى زاتتاردىڭ ءىزى تابىلعان جوق. سوعان قاراماستان، ونى مەكتەپتەن شىعاردى. ۇلىمنىڭ كەۋدەسىن ەلەكتروشوكەرمەن ۇرىپ، پىشاقپەن قورقىتقان. ءتىپتى ينەمەن شانشىعان كەزدەرى بولعان. ۇلىمنىڭ دەنەسىندە پىشاق ىزدەرى بار»، – دەيدى اناسى.
وقۋشىنى مەكتەپتەن شىعارعان. جاعدايعا قاتىستى اتىراۋ وبلىستىق ءبىلىم باسقارماسى پىكىر ءبىلدىردى. باسقارما وقۋشىنىڭ ءتارتىپ بۇزۋشىلىقتارىن بىرنەشە رەت قايتالاعانىن جانە وسىنىڭ سالدارىنان مەكتەپتەن شىعارىلعانىن حابارلادى.
«وقۋشى قىركۇيەك ايىندا بىرنەشە ءتارتىپ بۇزۋشىلىق جاساعان. وعان ەسكەرتۋ بەرىلدى. جەلتوقساندا بۇل جاعداي قايتا قايتالانعان سوڭ، پەداگوگيكالىق كەڭەس شەشىمىمەن وقۋشى مەكتەپتەن شىعارىلدى»، – دەلىنگەن ءبىلىم باسقارماسىنىڭ مالىمدەمەسىندە.
قازىرگى ۋاقىتتا اتا-انالاردىڭ شاعىمى بويىنشا تەرگەۋ امالدارى ءجۇرىپ جاتىر.
