باس پروكۋراتۋرا بوپسالاۋمەن اينالىسقان ءانونيمدى QirSabyn Telegram-ارناسىنىڭ اكىمشىلەرىنىڭ ۇستالعانىن راستادى، دەپ حابارلايدى "ادىرنا" ۇلتتىق پورتالى.
توپ 8 جەلتوقسان كۇنى ۇستالعان.
"باس پروكۋراتۋرانىڭ ۇيلەستىرۋىمەن ۇقك-ءىىم-ءنىڭ ۆەدومستۆوارالىق تەرگەۋ-وپەراتيۆتىك توبى جانە قما-نىڭ مامانداندىرىلعان بولىمشەسى استانا مەن قاراعاندى قالالارىندا QirSabyn Telegram-ارناسىندا جالعان اقپاراتتى جاريالايمىز دەپ قورقىتىپ اقشا بوپسالاۋمەن اينالىسقان توپتى ۇستادى", – دەلىنگەن حابارلامادا.
تەرگەۋشىلەردىڭ ءىرى كولەمدەگى اقشا، تەحنيكا جانە وزگە دە ايعاق زاتتاردى تاركىلەگەنى حابارلاندى.
"Telegram-ارنانىڭ اكىمشىلەرى سوت سانكتسياسىمەن قاماۋعا الىندى. قاجەتتى تەرگەۋ جانە جەدەل شارالار جۇرگىزىلۋدە. تەرگەۋ بارىسىندا وزگە اقپارات جاريالانبايدى", – دەپ مالىمدەدى باس پروكۋراتۋرا.
QirSabyn Telegram-ارناسىنا قاتىستى ادامداردىڭ ۇستالعانى تۋرالى قاۋەسەت 19 جەلتوقساندا تاراعان. رەسمي تۇردە راستاۋ تەك بۇگىن كەلىپ ءتۇستى.
جۋرناليست ميحايل كوزاچكوۆتىڭ ايتۋىنشا، ءىس ءىرى قۇرىلىس كومپانياسىنىڭ يەسى جانە جوعارى لاۋازىمدى شەندى ادامنىڭ ۇلىنىڭ ارىزىنان كەيىن باستالعان.
QirSabyn – ساياساتكەرلەر، بلوگەرلەر جانە قازاقستانداعى تانىمال ادامداردىڭ جەكە مالىمەتتەرىن جاريالايتىن ءانونيمدى Telegram-ارنا. ارناعا 110 000-نان استام جازىلۋشى تىركەلگەن.
