Bas prokýratýra bopsalaýmen aınalysqan anonımdi QirSabyn Telegram-arnasynyń ákimshileriniń ustalǵanyn rastady, dep habarlaıdy "Adyrna" ulttyq portaly.
Top 8 jeltoqsan kúni ustalǵan.
"Bas prokýratýranyń úılestirýimen UQK-IIM-niń vedomstvoaralyq tergeý-operatıvtik toby jáne QMA-nyń mamandandyrylǵan bólimshesi Astana men Qaraǵandy qalalarynda QirSabyn Telegram-arnasynda jalǵan aqparatty jarııalaımyz dep qorqytyp aqsha bopsalaýmen aınalysqan topty ustady", – delingen habarlamada.
Tergeýshilerdiń iri kólemdegi aqsha, tehnıka jáne ózge de aıǵaq zattardy tárkilegeni habarlandy.
"Telegram-arnanyń ákimshileri sot sankııasymen qamaýǵa alyndy. Qajetti tergeý jáne jedel sharalar júrgizilýde. Tergeý barysynda ózge aqparat jarııalanbaıdy", – dep málimdedi Bas prokýratýra.
QirSabyn Telegram-arnasyna qatysty adamdardyń ustalǵany týraly qaýeset 19 jeltoqsanda taraǵan. Resmı túrde rastaý tek búgin kelip tústi.
Jýrnalıst Mıhaıl Kozachkovtyń aıtýynsha, is iri qurylys kompanııasynyń ıesi jáne joǵary laýazymdy shendi adamnyń ulynyń aryzynan keıin bastalǵan.
QirSabyn – saıasatkerler, blogerler jáne Qazaqstandaǵy tanymal adamdardyń jeke málimetterin jarııalaıtyn anonımdi Telegram-arna. Arnaǵa 110 000-nan astam jazylýshy tirkelgen.
