اقش پرەزيدەنتى دونالد ترامپ 20 قاڭتاردا ۆاشينگتونداعى يناۋگۋراتسياسىنا قىتاي حالىق رەسپۋبليكاسىنىڭ توراعاسى سي ءتسزينپيندى شاقىردى. بۇل تۋرالى 11 جەلتوقساندا امەريكاندىق CBS تەلەارناسى ءوزىنىڭ دەرەككوزدەرىنە سىلتەمە جاساپ جاريالادى، دەپ حابارلايدى “ادىرنا” ۇلتتىق پورتالى.
دەرەككوز بويىنشا، رەسپۋبليكاندىق كانديدات ترامپ بۇل شاقىرۋدى قاراشا ايىندا سايلاۋدا جەڭىسكە جەتكەننەن كەيىن، سي تسزينپينگە جىبەرگەن. الايدا قىتاي ليدەرى شاقىرۋدى قابىلداعانى نەمەسە قابىلداماعانى بەلگىسىز. قىتايدىڭ ۆاشينگتونداعى ەلشىلىگى بۇل مالىمەتتەرگە تۇسىنىكتەمە بەرۋدەن باس تارتتى.
CBS اتاپ وتكەندەي، ترامپتىڭ اينالاسىنداعىلاردىڭ كوپشىلىگى قىتاي بيلىگىنە نارازى. سىنشىلار اراسىندا اقش-تىڭ بولاشاق مەملەكەتتىك حاتشىسى ماركو رۋبيو، سونداي-اق ۇلتتىق قاۋىپسىزدىك جونىندەگى جاڭا كەڭەسشى مايك ۆالتس بار. سايلانعان پرەزيدەنتتىڭ ءوزى قىتايدان كەلەتىن تاۋارلارعا جاڭا تاريفتەر ەنگىزەمىز دەپ قورقىتۋدا. بىراق، ارنا اتاپ وتكەندەي، «ترامپ كوپتەن بەرى كوشباسشىلار اراسىنداعى تىعىز قارىم-قاتىناس حالىقارالىق مامىلەلەردى جاساۋدىڭ كىلتى دەپ سانايدى».
سي تسزينپين اقش پرەزيدەنتىنىڭ يناۋگۋراتسياسىنا قاتىسقان العاشقى شەتەلدىك باسشى بولۋ مۇمكىن. CBS حابارلاۋىنشا، ادەتتە بۇل ءىس-شاراعا تەك ەلشىلەر مەن ديپلوماتتار شاقىرىلادى. اقش مەملەكەتتىك دەپارتامەنتىنىڭ 1874 جىلدان باستاپ جۇرگىزىلگەن جازبالارىنا سايكەس، شەتەلدىك باسشى ەشقاشان يناۋگۋراتسيا كەزىندە بيلىك اۋىسۋ راسىمىنە قاتىسپاعان.
CBS دەرەككوزدەرىنىڭ حابارلاۋىنشا، 20 قاڭتارداعى يناۋگۋراتسياعا باسقا دا شەتەلدىك كوشباسشىلاردى شاقىرۋى مۇمكىن. ولاردىڭ اراسىندا ۆەنگريا پرەمەر-ءمينيسترى ۆيكتور وربان دا بار. الايدا ول ءالى شاقىرۋدى قابىلدايتىنىن نەمەسە قابىلدامايتىنىن ويلاپ جاتىر.
"الەم كوشباسشىلارى ترامپپەن كەزدەسۋگە كەزەككە تۇر، ويتكەنى ولار ونىڭ جاقىندا بيلىككە قايتا ورالىپ، الەمدە بەيبىتشىلىكتى قالپىنا كەلتىرەتىنىن بىلەدى", - دەدى اق ءۇيدىڭ جاڭا ءباسپاسوز حاتشىسى كەرولاين ليۆيتت.
12 جەلتوقساندا رەسەي پرەزيدەنتى ۆلاديمير ءپۋتيننىڭ ءباسپاسوز حاتشىسى دميتري پەسكوۆ ترامپتىڭ يناۋگۋراتسياسىنا ءپۋتيندى شاقىرماعانىن مالىمدەدى.
