اقش-تاعى پرەزيدەنت سايلاۋىنا رەسپۋبليكالىق پارتيادان ءتۇسىپ جاتقان كانديدات، بۇرىنعى پرەزيدەنت دونالد ترامپقا تاعى دا قاستاندىق جاسالماق بولدى، دەپ حابارلايدى «ادىرنا» ءتىلشىسى.
وقيعا 15 قىركۇيەك كۇنى فلوريدا شتاتىنىڭ ۆەست پالم-بيچتەگى گولف الاڭىندا بولعان. Reuters باسىلىمىنىڭ مالىمەتىنشە، ترامپ تۇرعان جەردەن 100 مەتر قاشىقتىقتان وق اتىلعان. قۇپيا قىزمەت اگەنتتەرى بۇل ەكس-پرەزيدەنتكە جاسالعان قاستاندىق ارەكەت بولۋى مۇمكىن دەپ مالىمدەدى.
كۇدىكتىنى ءتىنتۋ كەزىندە سۋىق قارۋ، ەكى ريۋكزاك جانە GoPro بەينەكامەراسى تابىلدى. قازىرگى تاڭدا جاسى 58-دەن اسقان گاۆاي تۋماسى – رايان ۋەسلي روۋت ۇستالدى. ول بۇعان دەيىن 8 رەت ءارتۇرلى سەبەپپەن قاماۋعا الىنعان.
ال ترامپ الەۋمەتتىك جەلى ارقىلى ءوزىنىڭ ءدىن امان ەكەنىن جەتكىزدى.
«مەن قاۋىپسىز جەردەمىن. ەشكىم زارداپ شەككەن جوق. ەشتەڭە مەنى توقتاتا المايدى. مەن ەشقاشان بەرىلمەيمىن!» - دەدى ول.
ەسكە سالايىق، 13 شىلدەدە ترامپقا پەنسيلۆانياداعى سايلاۋالدى كەزدەسۋدە قاستاندىق جاسالعان بولاتىن. بۇل وقيعا كەزىندە ول جەڭىل جاراقاتتاندى.
