AQSh prezıdenti Donald Tramp 20 qańtarda Vashıngtondaǵy ınaýgýraııasyna Qytaı Halyq Respýblıkasynyń tóraǵasy Sı zınpındi shaqyrdy. Bul týraly 11 jeltoqsanda amerıkandyq CBS telearnasy óziniń derekkózderine silteme jasap jarııalady, dep habarlaıdy “Adyrna” ulttyq portaly.
Derekkóz boıynsha, respýblıkandyq kandıdat Tramp bul shaqyrýdy qarasha aıynda saılaýda jeńiske jetkennen keıin, Sı zınpınge jibergen. Alaıda Qytaı lıderi shaqyrýdy qabyldaǵany nemese qabyldamaǵany belgisiz. Qytaıdyń Vashıngtondaǵy elshiligi bul málimetterge túsinikteme berýden bas tartty.
CBS atap ótkendeı, Tramptyń aınalasyndaǵylardyń kópshiligi Qytaı bıligine narazy. Synshylar arasynda AQSh-tyń bolashaq memlekettik hatshysy Marko Rýbıo, sondaı-aq ulttyq qaýipsizdik jónindegi jańa keńesshi Maık Val bar. Saılanǵan prezıdenttiń ózi Qytaıdan keletin taýarlarǵa jańa tarıfter engizemiz dep qorqytýda. Biraq, arna atap ótkendeı, «Tramp kópten beri kóshbasshylar arasyndaǵy tyǵyz qarym-qatynas halyqaralyq mámilelerdi jasaýdyń kilti dep sanaıdy».
Sı zınpın AQSh prezıdentiniń ınaýgýraııasyna qatysqan alǵashqy sheteldik basshy bolý múmkin. CBS habarlaýynsha, ádette bul is-sharaǵa tek elshiler men dıplomattar shaqyrylady. AQSh Memlekettik departamentiniń 1874 jyldan bastap júrgizilgen jazbalaryna sáıkes, sheteldik basshy eshqashan ınaýgýraııa kezinde bılik aýysý rásimine qatyspaǵan.
CBS derekkózderiniń habarlaýynsha, 20 qańtardaǵy ınaýgýraııaǵa basqa da sheteldik kóshbasshylardy shaqyrýy múmkin. Olardyń arasynda Vengrııa premer-mınıstri Vıktor Orban da bar. Alaıda ol áli shaqyrýdy qabyldaıtynyn nemese qabyldamaıtynyn oılap jatyr.
"Álem kóshbasshylary Tramppen kezdesýge kezekke tur, óıtkeni olar onyń jaqynda bılikke qaıta oralyp, álemde beıbitshilikti qalpyna keltiretinin biledi", - dedi Aq úıdiń jańa baspasóz hatshysy Kerolaın Lıvıtt.
12 jeltoqsanda Reseı prezıdenti Vladımır Pýtınniń baspasóz hatshysy Dmıtrıı Peskov Tramptyń ınaýgýraııasyna Pýtındi shaqyrmaǵanyn málimdedi.
