توكيو دەموگرافيالىق داعدارىسپەن كۇرەسۋدىڭ جاڭا ءادىسىن سىناپ كورىپ جاتىر. قازىرگى ۋاقىتتا حالىق تەز قارتايۋدا، ال جاستار وزدەرىنىڭ جۇمىسباستىلىقتارى سالدارىنان بالا تۋعا اسىعار ەمەس. وسىعان بايلانىستى جاپونيا 4 كۇندىك جۇمىس اپتاسىن ەنگىزبەك، دەپ حابارلايدى "ادىرنا" ۇلتتىق پورتالى Fortune باسىلىمىنا سىلتەمە جاساپ.
باسىلىمنىڭ مالىمەتىنشە، توكيو ءوز قىزمەتكەرلەرىنە اپتاسىنا تەك ءتورت كۇن جۇمىس ىستەۋگە مۇمكىندىك بەرەدى. بۇل جاڭاشىلدىق ايەلدەرگە تۇسەتىن جۇكتەمەنى ازايتىپ، بالا تۋ دەڭگەيىن ارتتىرۋعا باعىتتالعان. ويتكەنى ەل حالقىنىڭ قارتايۋى الاڭداتارلىق جىلدامدىقپەن وسۋدە.
رەفورما اياسىندا قىزمەتكەرلەر اپتاسىنا ءتورت كۇن جۇمىس ىستەۋمەن قاتار، بالا كۇتىمىنە ارنالعان جارتىلاي دەمالىس الۋ مۇمكىندىگىنە يە بولادى. بۇل باستاما جۇمىس كۇنىن ەكى ساعاتقا قىسقارتۋعا مۇمكىندىك بەرەدى.
"ءبىز ايەلدەردىڭ تۋ جانە بالا تاربيەلەۋ سياقتى ومىرلىك جاعدايلارعا بايلانىستى مانسابىن قۇربان ەتپەۋى ءۇشىن جۇمىس تۇرلەرىن يكەمدى تۇردە قايتا قاراستىرىپ وتىرمىز" – دەدى توكيو گۋبەرناتورى يۋريكو كويكە وسى اپتادا وتكەن توكيو استانالىق اسسامبلەياسىنىڭ كەزەكتى سەسسياسىندا.
باسىلىمنىڭ مالىمەتىنشە، جاپونيادا تۋ كورسەتكىشى قاتارىنان سەگىزىنشى جىل قاتارىنان تومەندەپ كەلەدى. 2024 جىلدىڭ ءبىرىنشى جارتىسىندا ەلدەگى تۋ دەڭگەيى رەكوردتىق تومەن دەڭگەيگە جەتتى. نەبارى 350 مىڭ بالا دۇنيەگە كەلىپ، بۇل وتكەن جىلدىڭ سايكەس كەزەڭىمەن سالىستىرعاندا 5,7 پايىزعا از. ال استاناداعى تۋ كوەففيتسيەنتى رەكوردتىق 0,99 بالاعا دەيىن تومەندەدى، ال حالىق سانىن تۇراقتى ساقتاۋ ءۇشىن بۇل كورسەتكىش 2,1 بولۋى كەرەك.
ايتا كەتەيىك، جاپونيا ۇكىمەتى تۋ كورسەتكىشىن ارتتىرۋ ماقساتىندا بىرنەشە ونجىلدىق بويى ءتۇرلى شارالار ەنگىزىپ كەلەدى. ماسەلەن، بالاباقشالارعا سۋبسيديالار، بالا كۇتىمى بويىنشا ۇزاق دەمالىستار جانە تانىسۋ قوسىمشاسىنىڭ ىسكە قوسىلدى. الايدا بۇل شارالاردىڭ اسەرى از بولدى. سەبەبى قاتاڭ ەڭبەك مادەنيەتى مەن ايەلدەرگە تۇسەتىن جۇكتەمە وزگەرىسسىز قالدى.
زەرتتەۋلەرگە سايكەس، جۇمىس اپتاسىن قىسقارتۋ ۇيدەگى مىندەتتەردى تەڭدەي بولىسۋگە جانە ءومىر ءسۇرۋ ساپاسىن جاقسارتۋعا ىقپال ەتەدى. التى ەلدە جۇرگىزىلگەن تاجىريبە ەر ادامداردىڭ بالالارىمەن كوبىرەك ۋاقىت وتكىزىپ، ءۇي شارۋاسىنا بەلسەندى ارالاساتىندىعىن كورسەتتى، دەپ حابارلايدى باسىلىم.ايەلدەر ەرلەرگە قاراعاندا بەس ەسە كوپ اقىسىز جۇمىس اتقاراتىن جاپونيا ءۇشىن بۇل ماڭىزدى قادام بولۋى مۇمكىن.
ء"تورت كۇندىك جۇمىس اپتاسى ءتيىمدى بولۋى مۇمكىن. بىراق ول بارلىق سالالار مەن ەلدەرگە امبەباپ شەشىم بولا المايدى،" – دەپ ءتۇسىندىردى ەڭبەك تاجىريبەسى بويىنشا ساراپشى دجۋليا حوبسبوم.
