كەشە ۇلتتىق مۋزەيدە قر قولونەرشىلەر وداعىنىڭ مۇشەسى، حالىقارالىق يۋنەسكو ساپا بەلگىسىنىڭ يگەرى، ەتنوديزاينەر تىلەك سۇلتاننىڭ «كيەلى كيمەشەك» كورمەسى ءوتتى، دەپ حابارلايدى "ادىرنا" ۇلتتىق پورتالى ەگەمەن قازاقستان گازەتىنە سىلتەمە جاساپ.
تىلەك سۇلتان - ۇلى دالانىڭ ۇلتتىق قولونەرىن زەرتتەۋشى عانا ەمەس، قالپىنا كەلتىرۋشى ءارى دارىپتەۋشى. كورمەدە ەتنوديزاينەر ءوزى تىككەن جانە جيناقتاعان تۇپنۇسقا 30 كيمەشەكتى كوپشىلىك نازارىنا ۇسىندى.
"كيمەشەك - كوشپەلى ورتادا قالىپتاسقان، ەكولوگيالىق جانە تازالىق ەرەكشەلىكتەرىنە، ايەلدىڭ مورالدىق-ەتيكالىق تالاپتارىنا بايلانىستى پايدا بولعان قازاق ايەلدەرىنىڭ باس كيىمى. كيمەشەكتى بالالى بولعان انالار كيگەن، ياعني كيمەشەك انا اتانعاننىڭ بەلگىسى. ءوڭىرىنىڭ كوكىرەكتى جاۋىپ تۇرۋى بالا ەمىزگەندە دە وتە قولايلى بولعان" - دەيدى ەتنوديزاينەر تىلەك سۇلتان.
كورمە بارىسىندا تىلەك سۇلتاننىڭ ءوزى جاساعان ۇلتتىق كيىمدەرىنەن دەفيلە ءوتتى. ونى ەتنوديزاينەردىڭ اناسى جىبەك ادىلحانقىزى باستاپ شىقتى. تىلەك سۇلتان جينالعان قاۋىمعا كيمەشەك كيۋدىڭ فيلوسوفيالىق استارىن اقتارا وتىرىپ، ونى تاعۋ مەن شىلاۋىش وراۋدىڭ ۇلگىلەرىن دە كورسەتتى.
ۇلتتىق باس كيىمدى ۇلىقتاعان كورمەنى ۇيىمداستىرۋعا «قارا شاڭىراق» قوعامدىق بىرلەستىگىنىڭ توراعاسى، تاريحشى-ەتنولوگ تۇرار شاكەن ۇيىتقى بولىپ، استانا قالاسى اكىمدىگىنىڭ تىلدەردى دامىتۋ جانە ارحيۆ ءىسى «رۋحانيات» كمم قولداۋ كورسەتكەن.
"ۇلتتىق كيىم – ۇلتتىڭ بەت-بەينەسى، ۇلتتىق مادەنيەتتىڭ جارقىن كورىنىسى. ونىڭ ەستەتيكالىق، قوعامدىق-يدەولوگيالىق ءمان-ماڭىزى دا زور. دەيتۇرعانمەن، ۇلتتىق كيىم جان-جاقتى زەرتتەلىپ، دۇرىس ناسيحاتتالماعاندىقتان، كەيبىرەۋلەر باسقا اعىمنىڭ جەتەگىنە ەرىپ، وزگە ۇلتتىڭ كيىمىن كيىپ، قازاقى قۇندىلىعىمىزدى تەرىسكە شىعارا باستادى. وسى تۇرعىدان العاندا، قازاقتىڭ ءداستۇرلى كيىم-كەشەگىن قايتا جاڭعىرتىپ، ونى زامانعا ساي ساندەپ كيۋدىڭ ماڭىزى زور دەگەن ماقساتپەن وسى كورمەنى ۇيىمداستىردىق" – دەيدى «قارا شاڭىراق» قوعامدىق بىرلەستىگىنىڭ جەتەكشىسى، ەتنولوگ، ءتىل جاناشىرى تۇرار ساتتارقىزى.
تاعىلىمدى ءىس-شاراعا قر ءماجىلىس دەپۋتاتتارى جيگۋلي دايراباەۆ، نۇرگۇل تاۋ، ولجاس قۇسپەكوۆ، استانا قالاسى اكىمىنىڭ ورىنباسارى ەسەت بايكەن، «AMANAT» پارتياسى استانا قالالىق فيليالىنىڭ توراعاسى مۇحاممەد بولىسبەك، «Respublica» پارتياسى استانا قالالىق فيليالىنىڭ توراعاسى شىڭعىس تۇسىپباەۆ، قىرعىزستاننان ارنايى بەلگىلى ەتنوديزاينەر اسەل كالكانوۆا، تانىمال زەرگەر، رەستاۆراتور بەرىك ءالىباي، بەلگىلى مادەنيەتتانۋشى، جازۋشى زيرا ناۋرىزباي، جازۋشى-ستسەناريست ۇلاربەك نۇرعالىمۇلى، اكتريسا، ءانشى اينۇر جۇگىنىسوۆا، تەلەجۇرگىزۋشى ساندي سۇلتان جانە باسقا دا قادىرمەندى قوناقتار، زيالى قاۋىم وكىلدەرى، قالا جۇرتشىلىعى قاتىسىپ، ىستىق ىقىلاستارىن جەتكىزدى.
ۇلتتىق قۇندىلىقتى ناسيحاتتاپ جۇرگەن تىلەك سۇلتاننىڭ كورمەلەرى تەك قازاقستاندا عانا ەمەس، تۇركيا، اقش، ءۇندىستان، وزبەكستان، قىرعىزستان سياقتى شەتەلدەردەگى بايقاۋلاردا كورەرمەن كوزايىمىنا اينالعان.
