Keshe Ulttyq mýzeıde QR Qolónershiler odaǵynyń múshesi, halyqaralyq IýNESKO sapa belgisiniń ıgeri, etnodızaıner Tilek Sultannyń «Kıeli kımeshek» kórmesi ótti, dep habarlaıdy "Adyrna" ulttyq portaly Egemen Qazaqstan gazetine silteme jasap.
Tilek Sultan - uly dalanyń ulttyq qolónerin zertteýshi ǵana emes, qalpyna keltirýshi ári dáripteýshi. Kórmede etnodızaıner ózi tikken jáne jınaqtaǵan túpnusqa 30 kımeshekti kópshilik nazaryna usyndy.
"Kımeshek - kóshpeli ortada qalyptasqan, ekologııalyq jáne tazalyq erekshelikterine, áıeldiń moraldyq-etıkalyq talaptaryna baılanysty paıda bolǵan qazaq áıelderiniń bas kıimi. Kımeshekti balaly bolǵan analar kıgen, ıaǵnı kımeshek ana atanǵannyń belgisi. Óńiriniń kókirekti jaýyp turýy bala emizgende de óte qolaıly bolǵan" - deıdi etnodızaıner Tilek Sultan.
Kórme barysynda Tilek Sultannyń ózi jasaǵan ulttyq kıimderinen defıle ótti. Ony etnodızaınerdiń anasy Jibek Ádilhanqyzy bastap shyqty. Tilek Sultan jınalǵan qaýymǵa kımeshek kııýdiń fılosofııalyq astaryn aqtara otyryp, ony taǵý men shylaýysh oraýdyń úlgilerin de kórsetti.
Ulttyq bas kıimdi ulyqtaǵan kórmeni uıymdastyrýǵa «Qara shańyraq» qoǵamdyq birlestiginiń tóraǵasy, tarıhshy-etnolog Turar Sháken uıytqy bolyp, Astana qalasy ákimdiginiń Tilderdi damytý jáne arhıv isi «Rýhanııat» KMM qoldaý kórsetken.
"Ulttyq kıim – ulttyń bet-beınesi, ulttyq mádenıettiń jarqyn kórinisi. Onyń estetıkalyq, qoǵamdyq-ıdeologııalyq mán-mańyzy da zor. Deıturǵanmen, ulttyq kıim jan-jaqty zerttelip, durys nasıhattalmaǵandyqtan, keıbireýler basqa aǵymnyń jetegine erip, ózge ulttyń kıimin kıip, qazaqy qundylyǵymyzdy teriske shyǵara bastady. Osy turǵydan alǵanda, qazaqtyń dástúrli kıim-keshegin qaıta jańǵyrtyp, ony zamanǵa saı sándep kıýdiń mańyzy zor degen maqsatpen osy kórmeni uıymdastyrdyq" – deıdi «Qara shańyraq» qoǵamdyq birlestiginiń jetekshisi, etnolog, til janashyry Turar Sáttarqyzy.
Taǵylymdy is-sharaǵa QR Májilis depýtattary Jıgýlı Daırabaev, Nurgúl Taý, Oljas Quspekov, Astana qalasy ákiminiń orynbasary Eset Baıken, «AMANAT» partııasy Astana qalalyq fılıalynyń tóraǵasy Muhammed Bolysbek, «Respublica» partııasy Astana qalalyq fılıalynyń tóraǵasy Shyńǵys Túsipbaev, Qyrǵyzstannan arnaıy belgili etnodızaıner Asel Kalkanova, tanymal zerger, restavrator Berik Álibaı, belgili mádenıettanýshy, jazýshy Zıra Naýryzbaı, jazýshy-senarıst Ularbek Nurǵalymuly, aktrısa, ánshi Aınur Júginisova, telejúrgizýshi Sandı Sultan jáne basqa da qadirmendi qonaqtar, zııaly qaýym ókilderi, qala jurtshylyǵy qatysyp, ystyq yqylastaryn jetkizdi.
Ulttyq qundylyqty nasıhattap júrgen Tilek Sultannyń kórmeleri tek Qazaqstanda ǵana emes, Túrkııa, AQSh, Úndistan, Ózbekstan, Qyrǵyzstan sııaqty shetelderdegi baıqaýlarda kórermen kózaıymyna aınalǵan.
